порлумон
ДЕВАШТИЧ БА ИНТИХОБОТ ОМОДА АСТ
Омодагиҳо ба маъракаи муҳими сиёсӣ – интихоботи вакилони халқ дар ноҳияи Деваштичи вилояти Суғд дар асоси Фармони Президенти Ҷумҳурии Тоҷикистон аз 4 декабри соли 2019 «Дар бораи таъйин намудани интихоботи даъвати нави Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ» муташаккилона ҷараён дорад.
Сокинони ноҳия бо назардошти дарки аҳамияти баргузории ин чорабинии сиёсӣ омодаанд, ки ба номзадҳои арзанда овоз диҳанд. Дар ҳудуди ноҳия ҳавзаи интихоботии ҷумҳуриявии Деваштич №24 оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон бо фарогирии қисми ноҳияи Деваштич дар доираи Ҷамоати шаҳраки Ғончӣ, ҷамоатҳои деҳоти Муҷун, Ваҳдат, Росровут, Исмоили Сомонӣ, Далёни Боло ва қисми шаҳри Истаравшан дар доираи ҷамоатҳои деҳоти Қалъаи Баланд ва Ҷавкандак таъсис ёфта, 81 участкаи интихоботӣ, аз ҷумла 50 адад дар ҳудуди ноҳия ва 31 адад дар қисмати шаҳри Истаравшан, фаъол гардидаанд. Участкаҳо бо маводи зарурии интихоботӣ, аз ҷумла муҳр, навиштаҷоти номгӯи участкаҳои интихоботӣ бо нишондоди рақам, маводи конселярӣ, ороиши кабинаҳои интихоботӣ ва гӯшаҳои интихоботӣ таъмин карда шудаанд.
Тавре раиси комиссияи ноҳиявии интихобот оид ба интихоботи маҷлиси намояндагони халқ Тӯйчибой Маҳкамов изҳор намуд, ҳавзаи якмандатии интихоботии Деваштич № 24 дар асоси қарори Комиссияи марказии интихобот ва раъйпурсии Ҷумҳурии Тоҷикистон дар ҳайати 15 нафар таъсис ёфта, дар бинои қасри фарҳанги ноҳия (шаҳраки Ғончӣ) ҷо гирифтааст. Барои фаъолияти аъзои комиссия тамоми шароити мусоид фароҳам оварда шудааст. 4 ҳавзаи интихоботии интихоби вакилони халқи вилояти Суғд - ҳавзаҳои интихоботии Ғончӣ, Муҷун, Ваҳдат ва Исмоили Сомонӣ низ пурра дар ҳолати омодабош қарор доранд. Дар ноҳия 40 ҳавзаи интихоботӣ оид ба интихоби вакилони халқи ноҳияи Деваштич низ таъсис дода шуда, дар як вақт 69 ҳавзаи интихоботӣ, ки аз ин 8 ҳавза навбунёд мебошад, ба аҳолӣ хидмат хоҳанд расонд. То имрӯз номзадии 5 нафар тариқи худпешбарӣ ба вакилии Маҷлиси намояндагони Маҷлиси Олии Ҷумҳурии Тоҷикистон пешниҳод гардид ва ҳоло ҷараёни таблиғи номзадҳо оғоз шудааст.
Барои тарғибу ташвиқи муҳимияти баргузории ин маъракаи сиёсӣ ба ҳолати имрӯза беш аз 230 шиору овезаҳои даъватӣ ва тарғиботӣ дар ҷойҳои ҷамъиятӣ насб гардидаанд. Ин барои 8 918 нафар интихобкунанда, ки бори аввал дар чорабинӣ иштирок менамояд, имконияти хуби шиносоӣ бо рафти овоздиҳӣ дар интихобот мебошад.
Оҳистамоҳ ВАФОБЕК,
“Ҷумҳурият”
Баёни ақида (0) Санаи нашр: 19.02.2020 №: 37 Мутолиа карданд: 2762
