порлумон
МУЪМИНОБОД. СОКИНОН БАРОИ ФАРДОИ ДУРАХШОН РАЪЙ МЕДИҲАНД
Дар доираи қонунгузорӣ вобаста ба раванди омодагӣ ба интихоботи вакилон ба Маҷлиси намояндагони Маҷлиси Олии Ҷумҳурии Тоҷикистон ва вакилони маҷлисҳои маҳаллии вакилони халқ як қатор тадбирҳо амалӣ гашта, ҷиҳати баланд бардоштани маърифати ҳуқуқии шаҳрвандон, иштироки фаъолонаи онҳо дар ин чорабинии муҳими сиёсӣ корҳои назаррас анҷом дода шудааст.
Ин нуктаро раиси комиссияи ҳавзаи ҳудудии интихоботии Муъминобод № 38 Раҷабалӣ Табаров зимни суҳбат бо хабарнигори «Ҷумҳурият» иброз намуд. Бино ба гуфтаи ӯ, кор дар ин ҳавза тибқи қонунгузории Ҷумҳурии Тоҷикистон ва санадҳои байналмилалии аз ҷониби Тоҷикистон эътирофгардида, ҷараён дорад. Тибқи ҷадвали таҳиягардида дар ҳамаи участкаҳои интихоботӣ навбатдории доимӣ ба роҳ монда шудааст.
Дар ин ҳавзаи интихоботӣ, ки ба он ноҳияҳои Ховалинг ва Шамсиддини Шоҳин низ шомиланд, шумораи овоздиҳандагон 103 ҳазору 697 нафарро ташкил медиҳад. Аз ин шумора 2800 шаҳрванд бори аввал дар интихобот иштирок мекунад. Барои 881 шахси имконияташ маҳдуд бошад, аз тарафи комиссияҳои участкавӣ қуттиҳои сайёр омода шудааст.
Айни замон, ҳамаи участкаҳои овоздиҳӣ бо кабинаҳои махсус муҷаҳҳаз буда, дар ҳудуди онҳо қуттиҳо барои бюллетенҳо омода мебошад. Инчунин, участкаҳои овоздиҳӣ бо маводи зарурӣ, тарғиботӣ ва конселярӣ пурра таъмин мебошанд. Шиору овезаҳои марбут ба ин маъракаи сиёсӣ насб ва гӯшаҳои иттилоотӣ оид ба маълумот дар бораи номзадҳо аз ҳавзаи якмандатӣ тартиб дода шудааст.
То ба имрӯз дар ҳавзаи ҳудудии якмандатии интихоботии Муъминобод № 38 аз ҷониби ҳизбҳои сиёсӣ Мироҷ Абдуллоев (Ҳизби коммунисти Тоҷикистон), Саъдулло Раҳимзода (ҲХДТ), инчунин, се нафар ба таври худпешбар–Маҳмудҷон Аҳмадзода (ноҳияи Шамсиддини Шоҳин), Парвизҷон Ҳисайнов (ноҳияи Ховалинг) ва Маъруф Таволоев (Ховалинг) ҳамчун номзад ба вакили Маҷлиси намояндагони Маҷлиси Олӣ ба қайд гирифта шудаанд.
Ҳоло вохӯрии номзадҳо дар ҷамоатҳои деҳоти Ҷонбахш, Лоҳутӣ, Шугнов (ноҳияи Ховалинг), ҷамоатҳои деҳоти Саричашма, Шӯробод, Даштиҷум (ноҳияи Шамсиддини Шоҳин) ва ҷамоатҳои деҳоти Балхобӣ, Ш. Шоҳин ва Ҷамоати шаҳраки Муъминобод (ноҳияи Муъминобод) бо интихобкунандагон идома доранд.
Бояд гуфт, ки барои мушоҳидони миллию байналмилалӣ низ шароити хуб муҳайё гардидааст.
- Бо итминон метавон гуфт, ки сокинони ноҳияҳои Муъминобод, Ховалинг ва Шамсиддини Шоҳин дар интихоботи даъвати нави вакилон ба Маҷлиси намояндагони Маҷлиси Олӣ ва маҷлисҳои маҳаллии вакилони халқ фаъолона иштирок намуда, барои шукуфоии кишвар раъйи худро медиҳанд, - гуфт Раҷабалӣ Табаров.
Холназар КАСИРОВ, «Ҷумҳурият»
Баёни ақида (0) Санаи нашр: 20.02.2020 №: 38 Мутолиа карданд: 4236
