порлумон
ИНТИХОБОТ ИФОДАИ ИРОДАИ ХАЛҚ
Тавре маълум аст, 1 марти соли ҷорӣ дар кишвари соҳибистиқлоли мо интихоботи даъвати нави вакилон ба Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ баргузор хоҳад шуд. Ин маъракаи муҳими сиёсӣ барои ташаккул ва ифодаи иродаи халқ нақши муҳим бозида, ба инкишофи унсурҳои демократӣ дар ҷомеа мусоидат менамояд.
Чӣ тавре ки дар Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зикр шуд: «Интихобот ифодаи олии бевоситаи ҳокимияти халқ тавассути изҳори озодона ва ихтиёрии иродаи интихобкунандагон буда, ба таври демократӣ ва озоду шаффоф баргузор намудани он яке аз вазифаҳои муҳими давлат мебошад».
Номзадҳои арзандаи ҳар як ҳизби сиёсӣ барои таъмини рушди устувор ва бомароми мамлакат, ки бо мақсади муҳайё кардани сатҳу сифати арзандаи зиндагии аҳолӣ, фароҳам овардани имкониятҳои баробар ҷиҳати татбиқи неруи инсонӣ дар асоси баробарӣ, адолат ва эҳтиром гузоштан ба шаъну шарафи инсон равона шудааст, пайваста саъю кӯшиш менамоянд.
Имрӯзҳо дар тамоми манотиқи кишвар номзадҳо бо интихобкунандагон вохӯриҳо анҷом дода, дархост, хоҳиш ва талаботи онҳоро шунида, дар ин замина ба барномаҳои пешазинтихоботии худ тағйирот ворид менамоянд. Аз ин рӯ, интихобот – омили асосии тавсеаи муносибатҳои байни ниҳодҳои давлатӣ ва шаҳрвандон мебошад. Ин маъракаи муҳими сиёсӣ имкон фароҳам меорад, ки шаҳрвандон бо назардошти манфиатҳои худ ҳизбу иттиҳодияҳои гуногунро таъсис дода, ба ин васила дар кори идоракунии давлатӣ ва пешбурди ҳаёти сиёсӣ фаъолона иштирок намоянд.
Конститутсияи Ҷумҳурии Тоҷикистон низоми бисёрҳизбиро пешбинӣ намуда, раванди интихоботро демократитар намуда, имконият фароҳам овард, ки ҳаёти ҷамъиятӣ дар асоси равияҳои гуногуни сиёсӣ ва мафкуравӣ инкишоф ёбад. Маҳз тавассути интихобот шаҳрвандон имкон пайдо менамоянд, ки беҳтарин намояндагони хешро барои иҷрои ормону иродаи худ ба вазифаҳои масъул интихоб намоянд.
Аз ин рӯ, иштироки фаъолонаи ҳар як шаҳрванди Тоҷикистон дар интихобот шаҳодати дарки масъулияти шаҳрвандӣ ва саҳмгузорӣ дар рушди минбаъдаи ҷомеа ва давлат буда, нишонаи баланди маърифатнокӣ ва фарҳангию сиёсӣ мебошад.
Маратҷон ҶАББОРОВ, ноҳияи Деваштич
Баёни ақида (0) Санаи нашр: 24.02.2020 №: 40 Мутолиа карданд: 6511
