порлумон
ШАҲРИНАВ. ОМОДАГИИ ҲАМАҶОНИБА БА МАЪРАКАИ МУҲИМИ СИЁСӢ
Дар ноҳияи Шаҳринав ҷиҳати дар сатҳи баланд доир намудани маъракаи муҳими сиёсӣ - интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ тадбирҳои зарурӣ меандешанд. Барои интихобкунандагон тамоми шароит муҳайё буда, онҳо имкони воқеӣ доранд, ки ба номзади арзандаи хеш овоз диҳанд.
Комиссияи ҳавзаи ҳудудии якмандатии интихоботии Шаҳринав № 6 дар бинои шуъбаи маориф ҷойгир буда, дар ҳайати 13 нафар ташкил шудааст. Аъзои комиссияи ҳавзаи интихоботӣ бо бейҷикҳо, маводи конселярӣ, қонуну дастурамалҳо, санадҳои меъёриву ҳуқуқӣ ва шароити хуби корӣ таъминанд.
Дар ин ҳавзаи интихоботӣ 136 ҳазору 523 овоздиҳанда сабти ном шудааст, ки 10 ҳазору 197 нафари онҳо бори аввал дар интихобот иштирок мекунанд.
Тавре раиси комиссияи ҳавзаи интихоботии Шаҳринав - 6 Мушаррафа Шарифова изҳор дошт, ҳавзаи мазкур аз 70 участка иборат буда, ҳамаи участкаҳо бо маводи иттилоотӣ таъмин карда шудаанд.
Ба ҳавзаи ҳудудии якмандатии интихоботии Шаҳринав 4 нафар номзад ба вакили Маҷлиси намояндагони Маҷлиси Олии Ҷумҳурии Тоҷикистон аз ҳизбҳои сиёсӣ ба қайд гирифта шуданд. Тибқи тақвими комиссия, аз 10 то 15 феврал вохӯрии якҷояи номзадҳо дар ҷамоатҳои шаҳраку деҳоти ноҳияи Шаҳринав, як қисми шаҳри Ҳисор ва як қисмати шаҳри Турсунзода бо аҳли ҷамоатчигӣ, фаъолон, сокинон ва раисони маҳаллаҳо гузаронда шуд.
Дар рафти вохӯриҳо намояндагони ҳизбҳои сиёсӣ, номзадҳо ва шахсони боэътимод ба сухан баромада, ҳозиронро бо ҳаёту фаъолияти номзадҳо ва барномаҳои пешазинтихоботии онҳо шинос намуданд. Интихобкунандагон аз номзадҳо ба саволҳои худ посухҳои амиқу мушаххас гирифтанд.
Иштирокдорони вохӯриҳо бори дигар боварӣ ҳосил намуданд, ки овози онҳо метавонад ҳалкунанда бошад. Пас аз муаррифии номзадҳо, баррасии барномаи кори онҳо, фикру мулоҳиза ва пешниҳодҳои мардум ба тарафдории номзадҳои арзанда овоз медиҳанд. Дар ин раванд касе набояд ба сарнавишти давлату миллат, ҳимояи марзу буми Ватани аҷдодӣ, пешрафту тараққиёт ва таъмини ояндаи дурахшони он барои наслҳои оянда бетараф бошад. Ширкати фаъолона ва ҳисси масъулият ба он нигаронда шавад, ки ҳар як интихобкунанда қарзи шаҳрвандии худро иҷро намояд.
Матлубаи АБДУҚАҲҲОР, «Ҷумҳурият»
Баёни ақида (0) Санаи нашр: 24.02.2020 №: 40 Мутолиа карданд: 6599
