маориф
МАОРИФ. ДАР ТАТБИҚИ НАҚШАҲОИ ПЕШВОИ МИЛЛАТ ФАЪОЛ БОШЕМ!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи маорифро яке аз соҳаҳои афзалиятноки муҳими ҷомеа ҳисобида, барои рушду нумӯи он пайваста кӯшишу ғамхории зиёд зоҳир менамоянд.
Ҷаноби Олӣ, дар Паёми навбатии худ ба Маҷлиси Олӣ иброз намуданд: «Дар марҳалаи кунунии пешрафти Тоҷикистон ба соҳаҳои илму маориф афзалияти аввалиндараҷа дода мешавад, зеро онҳо дар таҳкими пояҳои демократӣ ва ҳуқуқбунёду дунявӣ нақши калидӣ мебозанд».
Зикр намудан ба маврид аст, ки бо вуҷуди дастгириву ғамхориҳои давлату Ҳукумат, бахусус Пешвои миллат муҳтарам Эмомалӣ Раҳмон, ҳанӯз сатҳу сифати таълиму тарбия ба талабот ҷавобгӯ нест. Вобаста ба ин, иброз доштанд, ки роҳбарону кормандони соҳаи маорифро зарур аст сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо дар ҳамаи зинаҳои таҳсилот баланд бардоранд. Инчунин, назорати азхудкунии донишҳои замонавиро пурзӯр гардонда, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд.
Бо мақсади шиносоии хонандагон ба техникаву технология аз ҷониби Пешвои миллат муҳтарам Эмомалӣ Раҳмон солҳои 2020-2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» эълон карда шуд. Ин моро водор месозад, ки ба омӯзиши ин илмҳо диққати бештар зоҳир намуда, хонандагонро дар рӯҳияи ихтирооту ихтироъкорӣ ба камол расонем.
Бо мақсади боз ҳам баланд бардоштани сатҳу сифати таълиму тарбия дар рӯҳияи худшиносӣ, ифтихори миллӣ ва арзишҳои миллӣ моро лозим меояд, ки онҳоро ба мутолиаи китоб ҷалб намоем. Вобаста ба ин масъала Пешвои миллат таъкид намуданд, ки ҳар сол озмуни «Фурӯғи субҳи доноӣ китоб аст» - ро баргузор намуда, ба он доираи ҳарчи васеътари ҷомеа ҷалб ва ҷиҳати ҳавасмандсозии ғолибон аз мактаб сар карда, то мақомоти маҳалливу марказии ҳокимият чораҷӯӣ карда шавад. Вазорати маориф ва илм, вазорату идораҳое, ки дар сохторашон муассисаҳои таълимӣ доранд, роҳбарони мақомоти ҳокимияти давлатии вилоятҳо ва шаҳру ноҳияҳо вазифадор карда шудаанд, ки минбаъд ҳар сол озмуни «Фурӯғи субҳи доноӣ китоб аст»-ро аз рӯи се самт ба роҳ монанд.
Ҳамаи ин кумаку ғамхориҳо моро водор месозад, ки барои баланд бардоштани сифати таълиму тарбия ва тайёр намудани мутахассисиони рақобатпазири бозори ҷаҳонии меҳнат тамоми чораҳоро андешем.
Парвиз ЛОИҚОВ,
Зулфия ҶИЁНЗОДА,
устодони Донишгоҳи давлатии Кӯлоб
ба номи Абуабдуллоҳи Рӯдакӣ
Баёни ақида (0) Санаи нашр: 27.02.2020 №: 43 Мутолиа карданд: 3172
