фарҳанг
САРАЗМ ВА ЭЪТИРОФИ ҶАҲОНИИ ТАЪРИХИ МИЛЛӢ
Бисёр рамзист, ки 5500 - солагии Саразми бостонӣ ба Солҳои рушди деҳот, сайёҳӣ ва ҳунарҳои мардумӣ рост омад. Зеро Саразм ҳамчун падидаи муҳими сайёҳии таърихӣ шинохта шуда, имрӯз ҷаҳониён аз ин тамаддуни нодир огоҳанд. Ин шаҳодат бар он аст, ки мо дар саргаҳи тамаддун қарор дорем ва ин барои миллати тоҷик на танҳо ифтихор, балки масъулияти бузург мебошад.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ифтихор зикр карда буданд: “Дар даврони Истиқлолияти давлатӣ оину ҷашнҳои миллӣ ва арзишҳои фарҳангие, ки дар давоми асрҳо ягонагии маънавии мардумро ҳифз мекарданд, аз қабили Наврӯз, Меҳргон, Сада, Шашмақом, Фалак, атласу адрас, чакан ва монанди инҳо эҳё гардиданд. Мо тасмим гирифтем, ки соли 2020 ҷашни яке аз ёдгориҳои бостонии кишварамон – шаҳри қадимаи Саразмро доир намоем. Ин чорабинӣ имкон медиҳад, ки мо маданияти беш аз 5500 - солаи аз ҷониби доираҳои илмии ҷаҳон эътирофшудаи худро ба ҷаҳониён ба таври шоиста муаррифӣ созем”.
Ҳанӯз дар ибтидои соли 2000 - ум Сарвари давлат аз ёдгории Саразм дидан намуда, супориш доданд, ки шаҳрак аз таъсири омилҳои табиӣ эмин дошта шуда, омӯзишу таҳқиқоти бостоншиносӣ дар ин мавзеъ васеъ ба роҳ монда шавад. Дар радаи аввали сарсупурдагони таҳқиқи ин ёдгорӣ ному насаби бостоншинос, номзади илмҳои таърих Абдуллоҷон Исҳоқов меистад.
Минбаъд роҳи ин таърихдони маъруфро шогирдонаш идома дода, бо ҷалби бостоншиносон аз Фаронсаву Россия собит карданд, ки ёдгории Саразм таҷассуми дигаргуниҳои бузурги иқтисодӣ, сиёсӣ, динӣ, иҷтимоӣ ва пайдоиши ҳунармандиву кишоварзӣ дар ҳаёти ориёиҳои асри биринҷӣ ба шумор меравад.
Ба ифтихори 5500 - солагии ин ёдгорӣ соли ҷорӣ ба Тоҷикистон меҳмонон ва пажӯҳишгарону бостоншиносони хориҷӣ ташриф меоранд. Дар баробари Саразм, ҳамчунин, аз гӯшаву канори гуногуни кишварамон дидан мекунанд, дар ин маврид аз мо маданияти баланди шаҳрдорӣ, забондонӣ ва муоширати нек талаб карда мешавад.
Мо омӯзгорон, бахусус муаллимони фанни таърихро зарур аст, ки Саразм ва дигар ёдгориҳои таърихии халқамонро ба шогирдон дуруст муаррифӣ кунем ва дар партави таъкидҳои Пешвои миллат муҳтарам Эмомалӣ Раҳмон худшиносии насли ҷавонро ташаккул диҳем.
Гулшан МАМАДҚУЛОВА,
омӯзгори фанни таърихи гимназияи “Кафолат”
Баёни ақида (0) Санаи нашр: 02.03.2020 №: 45 Мутолиа карданд: 682
