иқтисод
ХАТЛОН. КИШТИ ПУНБАДОНА ОҒОЗ ЁФТ
Бо мусоид омадани обу ҳавои имсола дар 25 гектар замини ҳудуди деҳоти «Нури Вахш», «Деҳқонобод» ва «Ҷиликӯл» - и ноҳияи Дӯстӣ кишти пунбадона дар зери плёнка шурӯъ гардид.
Носирҷон Маъмурзода, мудири шуъбаи иттилоотию таҳлилии дастгоҳи раиси вилояти Хатлон, ба «Ҷумҳурият» иттилоъ дода, гуфт, ки дар оғози кишти чигит муовини Сарвазири мамлакат Давлатшоҳ Гулмаҳмадзода, вазири кишоварзӣ Амонулло Салимзода, директори Агентии беҳдошти замин ва обёрии назди Ҳукумати ҷумҳурӣ Холмурод Раҳмон, раиси вилоят Қурбон Ҳакимзода ва роҳбарони хоҷагиҳою деҳқонон иштирок карданд.
- Имсол дар ноҳияи Дӯстӣ, тибқи дурнамо, дар майдони 7 ҳазору 74 гектар чигит кишт карда мешавад. Танҳо ширкати «Ҷунтай Хатлон Син - Силу» дар беш аз 2 ҳазор гектар дар зери плёнка пунба кишт мекунад, - гуфт Носирҷон Маъмурзода.
Зимни боздид аз рафти кишт масъулони ширкати «Ҷунтай Хатлон Син - Силу» иттилоъ доданд, ки имсол аз навъи тухмии «Синзиян - 39» истифода бурдаанд, зеро ин навъи тухмӣ ба иқлими мавзеи Гароутӣ мувофиқ буда, ҳосили дилхоҳ медиҳад. Дар ин ҷо бо истифода аз 14 тухмипошак дар як рӯз дар 9 - 10 гектар замин пунбадона кишт мекунанд.
Ширкат беш аз 1000 тонна тухмии хушсифати навъи «Ҷиликӯл» захира карда, барои кишти ин навъи тухмӣ бо хоҷагиҳои пахтакори вилояти Хатлон ҳамкорӣ дорад.
Кароматулло АТО,
«Ҷумҳурият»
Баёни ақида (0) Санаи нашр: 02.03.2020 №: 45 Мутолиа карданд: 827
