иқтисод
ХУҶАНД. ОРЗУҲО ҶОМАИ АМАЛ МЕПӮШАНД
Бо мақсади сазовор пешвоз гирифтани Ҷашни 30 - солагии Истиқлолияти давлатии Ҷумҳурии Тоҷикистон дар шаҳри Хуҷанд бунёду навсозии 510 иншооти муҳими таъйиноти гуногун ба нақша гирифта шудааст. То ин дам 343 иншоот мавриди баҳрабардорӣ қарор гирифт.
Маъмури Юсуфзод, котиби матбуоти дастгоҳи раиси шаҳр, ба «Ҷумҳурият» иттилоъ дода, гуфт, ки дар шаҳр корҳои созандагию ободонӣ вусъати тоза касб намудаанд. Соҳибкорон ва афроди накукор дар бунёди мактабу бунгоҳҳои тиббӣ, марказҳои фароғатию истироҳатӣ, хизматрасонӣ, гулгашту хиёбонҳо, иншооти истеҳсолӣ, майдончаҳои варзишӣ, ободонию перостани кӯчаю маҳаллаҳо ва сабзкорӣ бо ҳам сабқат мекунанд. Ҳамин аст, ки рӯз ба рӯз маҳаллаҳои тозабунёди шаҳр низ зеботар гашта, ба ҳусни шаҳр ҳусн меафзоянд.
Чанде пеш дар хиёбони Исмоили Сомонии шаҳр бо иштироки раиси шаҳр Маъруф Муҳаммадзода маркази савдои либосҳои мардона, ки аз тарафи соҳибкори ватанӣ Мақсудҷон Набиев бунёд ёфтааст, ба истифода супурда шуд.
Раиси шаҳр Маъруф Муҳаммадзода, гуфт, ки бо иқдомҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кишвари мо ба марҳалаи рушд ворид гардида, пешрафти босуботи иҷтимоию иқтисодӣ ва татбиқи ислоҳоти фарогир дар ҳамаи соҳаҳо, аз ҷумла бахши хусусӣ ва фаъолияти соҳибкорӣ, таъмин гардид. Хушбахтона, дар ҳамаи самтҳои хизматрасонӣ ва истеҳсолӣ соҳибкорони шаҳр намунаи ибратанд.
Баробари ин, дар маҳаллаи Чашмаи Арзанаи шаҳр маркази таълимии ҳунарҳои мардумии «Дастони моҳир» мавриди баҳрабардорӣ қарор гирифт. Мақсад аз ташкили марказ дар доираи корҳои ободонию созандагӣ бахшида ба Ҷашни 30 - солагии Истиқлолияти давлатӣ ва Солҳои рушди деҳот, сайёҳӣ ва ҳунарҳои мардумӣ баланд бардоштани ҳунару истеъдоди кӯдакону наврасон, эҳёи анъанаҳои миллӣ, эҳтиром гузоштан ба суннатҳои мардумӣ, инчунин, боло бурдани дарки зебоипарастӣ мебошад.
Фирӯза Нуруллозода, муовини раиси шаҳр, зимни ифтитоҳи марказ ба ташаббускори ин иқдом гирандаи гранти раиси шаҳр, ғолиби озмуни «Кадбонуи беҳтарин» Назира Қурбонова изҳори миннатдорӣ намуд, ки як макони ноободро бунёд намуда, барои омӯзиш ва аз худ намудани касбу ҳунар барои духтарон шароит муҳайё кардааст.
Дар маркази таълимӣ бонувон давоми ду моҳ соҳиби касбу ҳунар ва шаҳодатнома мегарданд. Минбаъд дар марказ омӯзондани дӯзандагӣ, кашидадӯзӣ, сӯзанидӯзӣ, бофандагӣ, муҳрабофӣ, кешбофӣ ва ҳунарҳои дигари миллӣ дар назар аст. Ҳамчунин бонувони ҳунаромӯз бо идрорпулӣ низ таъмин хоҳанд шуд.
Бо эътимод метавон гуфт, ки то Ҷашни муқаддаси 30 - солагии Истиқлолияти давлатӣ бо заҳмати аҳлонаи кулли мардуми шаҳр тамоми нақшаҳои ояндасоз дар амал татбиқ гардида, зиндагии мардум зинати тоза мегирад.
Кароматулло АТО,
«Ҷумҳурият»
Баёни ақида (0) Санаи нашр: 30.03.2020 №: 61 Мутолиа карданд: 1068
