иқтисод
ВАЗОРАТ ЧОРА МЕҶӮЯД
Посух ба матлаби «Гармхона. Манбаи фаровонии сабзавот», ки 25 январи соли 2019 дар рӯзномаи «Ҷумҳурият» (№ 19) нашр шудааст.
Матлаби «Гармхона. Манбаи фаровонии сабзавот» дар раёсати рустанипарварии Вазорати кишоварзӣ мавриди таҳлилу баррасӣ қарор гирифт. Зикр гардид, ки дар ҳақиқат, васеъ кардани масоҳат ва истифодаи босамари гармхонаҳо барои таъмини аҳолии мамлакат дар фаслҳои тирамоҳу зимистон ва аввали баҳор бо сабзавоти тару тоза воситаи беҳтарин мебошад.
Тибқи маълумоти оморӣ, то 1 феврали соли 2020 дар гармхонаҳои доимоамалкунандаи хоҷагиҳои ҷамъиятию деҳқонӣ дар майдони 58,3 гектар сабзавот, аз ҷумла дар 8,7 гектар бодиринг, 36,9 гектар помидор ва 12,7 гектар намудҳои дигари сабзавот, кишт шудааст. Аз майдони умумии кишти сабзавот дар гармхонаҳои доимоамалкунанда 187,8 тонна сабзавоти тару тоза истеҳсол гардида, ба бозорҳои ҷумҳурӣ бароварда шудааст, ки аз он 33,6 тоннаро бодиринг, 109 тоннаро помидор ва 45,2 тоннаро намудҳои дигари сабзавот ташкил медиҳад.
Вазорати кишоварзӣ бо мақсади зиёд намудани майдони гармхонаҳои доимоамалкунанда ва ба ин васила таъмин намудани аҳолии мамлакат дар фаслҳои тирамоҳу зимистон бо сабзавоти тару тоза муқаррар намудани баъзе имтиёзҳоро, аз қабили кам кардани меъёри андозбандӣ, додани қарзҳои имтиёзноки дарозмуҳлат ва бо нархи дастрас таъмин намудани ангиштро мувофиқи мақсад мешуморад. Зеро чунин дастгирӣ метавонад ҳавасмандии деҳқононеро, ки ба парвариши сабзавоти барвақтӣ дар гармхонаҳои доимоамалкунанда машғуланд, зиёд намуда, ба рушди минбаъдаи ин соҳаи заҳматталаб такони ҷиддӣ бахшад.
М. МИРЗОЗОДА, муовини вазири кишоварзии Тоҷикистон
Баёни ақида (0) Санаи нашр: 01.04.2020 №: 63 Мутолиа карданд: 738
