иқтисод
ВАЗОРАТ ПЕШНИҲОДИ "ҶУМҲУРИЯТ"-РО ҚАБУЛ ДОРАД!
Матлаби Фаррух Абдувосиев, корманди Институти демография ва иқтисоди Академияи илмҳои Тоҷикистон, ки бо сарлавҳаи «Заминҳои доманакӯҳ ва кӯҳистон. Имконияти васеъ барои боғу токпарварӣ» 14 июни соли 2019 дар Нашрияи расмии Ҷумҳурии Тоҷикистон – рӯзномаи «Ҷумҳурият» (№ 112) ба табъ расидааст, дар раёсати рустанипарварии Вазорати кишоварзӣ мавриди таҳлилу баррасӣ қарор гирифт.
Зимни баррасӣ зикр гардид, ки дар ҳақиқат, рушди боғу токпарварӣ дар ҷумҳурӣ тақозои замон буда, он яке аз соҳаҳои асосии кишоварзии ҷумҳурӣ маҳсуб меёбад ва дар таъмини амнияти ғизоии мамлакат, баланд бардоштани сатҳи зиндагии мардум ва рушди содироти маҳсулот аҳамияти калон дорад. Алҳол дар мамлакат «Барномаи рушди соҳаи боғу токпарварӣ дар Ҷумҳурии Тоҷикистон барои солҳои 2016-2020» татбиқ шуда истодааст, ки барои такони ҷиддӣ бахшидан ба рушди соҳа комилан мусоидат мекунад.
Соли 2018, тибқи супориши Ҳукумати Ҷумҳурии Тоҷикистон, бунёди боғу токзор дар заминҳои обӣ манъ гардида, дар заминҳои талу теппаҳои бо намӣ таъмин вусъат гирифт.
Боғпарварони ҷумҳурӣ соли 2019 дар 2941,4 гекар боғу токзорҳои нав бунёд намуданд, ки аз онҳо 2746,9 гектарро боғ, 194,5 гектарро токзор, 197,7 гектарро боғҳои интенсивӣ ташкил медиҳанд. 2399,3 гектар боғу токзори куҳна аз нав барқарор карда шуд. Соли ҷорӣ дар доираи амалисозии «Барномаи рушди соҳаи боғу токпарварӣ дар Ҷумҳурии Тоҷикистон барои солҳои 2016 - 2020» бояд дар 2913 гектар боғу токзори нав бунёд карда шавад. Мувофиқи маълумоти фаврӣ, боғпарварони ҷумҳурӣ то охири моҳи феврали соли равон дар 905 гектар талу теппаҳои бо намӣ таъмин боғу токзори нав бунёд намуданд. Айни ҳол ҷараёни бунёди боғу токзор дар шаҳру ноҳияҳои ҷумҳурӣ идома дорад.
Татбиқи пурраи барнома ва рушди соҳаи боғу токпарварӣ ҳамеша дар меҳвари таваҷҷуҳ қарор дошта, аз ҷониби Вазорати кишоварзии Тоҷикистон барои рафъи камбудиҳо чораҳои муассир андешида мешаванд.
Музаффар МИРЗОЗОДА, муовини вазири кишоварзии Тоҷикистон
Баёни ақида (0) Санаи нашр: 13.04.2020 №: 72 Мутолиа карданд: 696
