иқтисод
ФАРХОР. КИШТИ ПУНБАДОНА БА АНҶОМ РАСИД
Фархор дар минтақаи Кӯлоб яке аз ноҳияҳои калонтарини пахтакор ба ҳисоб меравад. Тавре раиси ноҳия Раҳматзода Рустам Мирзо ба хабарнигори «Ҷумҳурият» иттилоъ дод, меҳнаткашони ноҳия дар ин соҳаи хеле пурарзиш таҷрибаи ғаниву бесобиқа доранд. Ҳар сол онҳо дар истеҳсоли ин ашёи хоми саноатӣ ба натиҷаҳои назарраси меҳнатӣ муваффақ мешаванду дараҷаи иқтисодии молиявии хешро бамаротиб боло мебардоранд. Имсол ҳам заҳматкашони ноҳия ба мавсими нави киштукори пунбадона тайёрии барвақт дида, яке аз аввалинҳо шуда дар вилояти Хатлон аз иҷрои дурнамои кишти чигит ҳисобот доданд. Онҳо аз рӯзҳои мусоиди офтобии баҳор самаранок истифода бурда, дар майдони 9 ҳазору 674 гектар замин пунбадонаи навъҳои серҳосили «Флеш», «Тобон», «Хуҷанд», «Хатлон – 2014» ва навъҳои хитоии ба иқлими ноҳия мусоид кишт намуданд, ки назар ба ҳамин давраи соли гузашта 74 гектар зиёд мебошад. Дар ин муваффақияти меҳнатӣ саҳми хоҷагиҳои пахтакори деҳоти Ғайрат, 20-солагии Истиқлолият, Деҳқон – Ариқ, Зафар, Фархор, Ватан, Гулшан, Ғалаба назаррас буда, барои рӯёндани ҳосили фаровон аз ҳоло заминаҳои боэътимод гузоштанд.
Бино ба иттилои сардори раёсати кишоварзии ноҳия Нуриддин Азаматов, дар мавсими киштукор пахтакорон аз 160 техникаи кишоварзӣ ва 95 тухмипошак пурсамар истифода бурда, рӯзе то 410 гектар чигит коштанд. Дар асоси ҳамкории мутахассисони соҳа, тариқи шартнома аз ҷониби ҶДММ «Зиёратшо» деҳқонон сари вақт бо сӯзишворӣ, нуриҳои минералӣ ва заҳрхимикатҳо таъмин гардиданд. Туфайли ин кишоварзон пеш аз муҳлат кишти пунбадонаро ба анҷом расонданд. Зимнан, бояд гуфт, ки пахта зироати нозук буда ва парвариши он заҳматталаб аст ва танҳо бо риояи қоидаҳои агротехникӣ метавон ҳосили хуб ба даст овард.
-Баъди пайдо шудани ҳашароти зараррасон, аз қабили тортанаккана ва шира, дар вақти нашъунамои ин зироат, бояд зидди онҳо заҳрхимикатҳои мувофиқро истифода бурд. Дар акси ҳол боиси талаф ёфтани ҳосили зироат мегарданд,- афзуд Нуриддин Азаматов. - Имсол пахтакорони ноҳия мақсад доранд, ки ҳосили ин ашёи хоми муҳими пурқимати саноатиро ба 21 ҳазору 904 тонна расонда, баҳри афзунии хирмани пахтаи кишвар саҳми арзанда гузоранд. Бо кумаку дастгирии мақомоти иҷроияи маҳаллии ҳокимияти давлатии ноҳия ва идораи давлатии беҳдошти замин ва обёрӣ, аллакай, то имрӯз тамоми заҳбуру заҳкашҳои обгузар аз сангу лойқа тоза карда шуда, пойгоҳҳои обкашонӣ барои таъмин намудан бо оби полизӣ дар ҳолатҳои омодабош қарор доранд.
Холназар КАСИРОВ,
«Ҷумҳурият»
Баёни ақида (0) Санаи нашр: 05.05.2020 №: 87 Мутолиа карданд: 1135
