фарҳанг
ВАРЗОБ. ҲУНАРҲОИ МАРДУМӢ РУШД МЕКУНАНД
Эълон гаштани Солҳои рушди деҳот, сайёҳӣ ва ҳунарҳои мардумӣ (2019 - 2021) дар рушди ин соҳаҳо нақши назаррас гузошт. Дар ин росто, ҳунарҳои мардумӣ эҳё шуда, дар минтақаҳои гуногуни кишвар мунтазам рушд намуда истодаанд. Дар ин радиф, дар ноҳияи Варзоб низ ба омӯзишу равнақи ҳунарҳои мардумӣ таваҷҷуҳи махсус зоҳир мегардад.
Муассисаи таҳсилоти иловагии назди шуъбаи маорифи ноҳия аз соли 2013 инҷониб фаъолият дошта, дар омӯзиши ҳунарҳои мардумӣ саҳм мегузорад. Дар муассиса 22 маҳфил амал намуда, 669 нафарро ба омӯзиши ҳунарҳои сабадбофӣ, қолинбофӣ, адрасбофӣ, қуроқдӯзӣ, зардӯзӣ, гулдӯзӣ, чакандӯзӣ ва монанди инҳо фаро гирифтааст.
Хонандагони муассиса дар ин муддат иштирокдори озмунҳои ноҳиявию ҷумҳуриявии “Кадбонуи беҳтарин”, “Беҳтарин роҳбари маҳфил”, “Корвони ҳунар”, “Сад ранги чакан”, “Дастони моҳир”, “Ихтироъкори ҷавон” гардида, сазовори ҷойҳои намоён шуданд.
– Боиси хушнудист, ки аксар ҷавонони мо ба омӯзиши ҳунарҳои аҷдодӣ мароқ зоҳир намуда, бо ҷаҳду талош ин касбҳоро аз худ карда истодаанд. Мақсади мо низ эҳё ва рушди ҳунарҳои мардумӣ, тарбияи ҷавонон дар рӯҳияи худшиносӣ, эҳтиром ба суннату арзишҳои миллӣ ва омӯзиши пешаю ҳунари ниёгон аст, - гуфт Сайрам Раҳмонова, директори муассиса.
Мавриди зикр аст, ки дар озмуни ҷумҳуриявӣ миёни муассисаҳои таҳсилоти иловагӣ, ки бо иштироки намояндагони 19 шаҳру ноҳияи кишвар баргузор шуд, ноҳияи Варзоб соҳиби ҷойи дуюм ва ифтихорномаю мукофоти Вазорати маориф ва илм гардид.
Ҳамчунин, дар ноҳияи Варзоб мактаби бачагонаи санъати назди бахши фарҳанги ноҳия амал мекунад, ки дорои 28 синфхона буда, ба 444 хонанда ҳунарҳои заргарӣ, кандакорӣ, коркарди чӯб, гулдӯзӣ, зардӯзӣ, қолинбофӣ, адрасу атласбофӣ меомӯзонад. Таълимгирандагон ҳамасола дар намоишҳои ноҳиявию ҷумҳуриявӣ маҳсули дасташонро ба маъраз мегузоранд.
Ҷиҳати бештар ҷалб намудани аҳолӣ, бахусус ҷавонон ва занони хонашин ба омӯзиши касбу ҳунарҳои мардумӣ дар ноҳия озмунҳои «Дастархонороӣ», «Ҷавондухтари ҳунарманд» ва «Кадбонуи беҳтарин» баргузор гардиданд.
Боиси тазаккур аст, ки зиёда аз 70 ҳунарманди ноҳия, аз ҷумла зардӯз, дӯзанда, оҳангар, ҳайкалтарош, сабадбоф, табақтарош, бофандаю гулдӯз, рӯзгорашонро аз маблағи фурӯши маҳсули дасти худ пеш мебаранд.
Мафтуна НУРИДДИН, «Ҷумҳурият»
Баёни ақида (0) Санаи нашр: 13.05.2020 №: 91 Мутолиа карданд: 731
