фарҳанг
АЗ ВОДИИ ВАХШ ТО БАҲРИ БАЛТИК
Қаҳрамони мо сержанти гвардия Мамадалӣ Имомалиев на танҳо се сол дар полку дивизияҳои гуногун ҷангид, балки соли 1945 бо паёми пирӯзӣ ва сари баланд ба Ватанаш – Тоҷикистон баргашт ва дар арсаи меҳнат, равнақи соҳаҳои хоҷагии халқ заҳмат кашиду талош варзид.
Мамадалӣ Имомалиев 10 октябри соли 1942 аз деҳаи Зарнисори деҳоти Меҳнатободи собиқ ноҳияи Бохтар (ҳоло Кӯшониён) ба Ҷанги Бузурги Ватанӣ, ба дифои Меҳан камар баст ва ҳангоми мубориза бар зидди фашизми гитлерӣ бо ҷонбозиву матонат корнамоии омӯзандаву ибратбахш нишон дод. Ӯ чандин дафъа аз тири фашистон захм бардошта бошад ҳам, боз ба по хесту набардро идома бахшид. Дар муҳорибаҳо аз 10 феврали соли 1943 то 9 майи соли 1945 ба ҳайси тирандоз, миномётчӣ ва гвардиячӣ дар сафи Қувваҳои Мусаллаҳи Иттиҳоди Шӯравӣ содиқона хизмат кард.
Дар фронтҳои ҷанубӣ, Матвей Курган, Украина, Перекоп, Севастопол, Прибалтика ва Пруссияи шарқӣ ҷонбозиҳо намуда, барои озод кардани шаҳрҳои Перекоп, Севастопол, Бартанштайн, гарданаи Айлау, Боғчасаройи Қрим бо чор раҳматномаи Сарфармондеҳи Олии Қувваҳои Мусаллаҳи Иттиҳоди Шӯравӣ маршал И. В. Сталин, ду медали «Барои ҷасорат», медалҳои «Барои гирифтани Кеннигсберг», «Барои ғалаба бар Германия дар ҶБВ» ва ордени «Ситораи сурх» сарфароз гардидааст.
Мамадалӣ Имомалиев баъд аз хотимаи ҷанг сарафроз ба Меҳан омад. Ӯ қаҳрамон буд, сари синаашро ордену медалҳо зеб медоданд, аммо мисли ҳар ҷавонмарди соҳибирода бо корномаҳояш мағрур нагашт, балки давоми зиндагии худро ба меҳнати ҳалол бахшиду фарзандони хушахлоқу ҳунарвар тарбия кард, ки яке аз онҳо собиқадори соҳаи журналистика, марде, ки бо хома ба дифои манфиатҳои миллату Ватан бархостааст, Қурбон Мадалиев мебошад.
Мамадалӣ Имомалиев то вопасин нафас аз заҳмату меҳнат канора наҷуст ва барои комёбиҳои меҳнатиаш бо "Ордени Ленин" қадр гашт.
Имрӯз фарзандон ҷодаи тайкардаи падарро намунаи ибрат медонанд.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: 13.05.2020 №: 91 Мутолиа карданд: 609
