иқтисод
ВМКБ. ФАРОВОНӢ ДАР БОЗОРҲОИ ШАҲРУ НОҲИЯ
Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни гуфтугӯи телефонӣ ба раиси Вилояти Мухтори Кӯҳистони Бадахшон Ёдгор Файзов дастур доданд, ки таъминоти аҳолии вилоят бо маводи озуқаворӣ таҳти назорати қатъӣ қарор дода шавад ва болоравии нарх дар бозор ва нуқтаҳои дигари савдои шаҳру деҳоти вилоят пешгирӣ гардад.
Бо ин мақсад, тибқи қарори раиси вилоят оид ба танзими нархи маҳсулоти хӯрокворӣ ситоди вилоятӣ ташкил гардид, ки онро Алишер Мирзонаботов, муовини якуми раиси вилоят, роҳбарӣ менамояд. Ҳафтаи гузашта фаъолияти ситод оид ба танзими нархи маҳсулоти хӯрокворӣ натиҷагирӣ шуд.
Зикр гардид, ки ситод аз 16 апрел ба ин сӯ арзиши маводи ғизоиро дар бозору дуконҳои шаҳру ноҳияҳои вилоят таҳти назорати ҷиддӣ қарор дода, бо мақсади пешгирӣ аз баландшавии нархи маводи хӯрокворӣ бо тоҷирону фурӯшандагон ҳамарӯза корҳои фаҳмондадиҳӣ доир менамояд. Ин аст, ки арзиши маҳсулоти хӯрокворӣ дар нуқтаҳои фурӯш то ҳол муътадил боқӣ мондааст. Аммо дар навбати харид ҷамъшавии аз ҳад зиёди одамон ва риоя нагардидани фосилаи физикии байни онҳо дар бозор ва нуқтаҳои дигари фурӯш ба назар мерасад. Бинобар ин, бо тасмими Ёдгор Файзов раиси Вилояти Мухтори Кӯҳистони Бадахшон, тақсимоти орд тавассути раисони ҷамоатҳои шаҳраку маҳаллаҳо ва табақаҳои шаҳри Хоруғ бо пешниҳоди рӯйхати ниёзмандон ба роҳ монда шуд.
Дар нуқтаҳои фурӯши шаҳру ноҳияҳои вилоят ҳамарӯза миқдори зарурии орд тавассути Агентии захираҳои моддии давлатии назди Ҳукумати Ҷумҳурии Тоҷикистон бо арзиши аз 225 то 254 сомонӣ барои 50 килограмм ба фурӯш гузошта мешавад. Давоми ҳафтаи охир ҳудуди 200 тона орд ба фурӯш бароварда шуда, таъминоти аҳолӣ бо орд бидуни мушкилот сурат гирифт.
Бино ба иттилои Насриддин Сабзалиев, сардори раёсати стандартизатсия, метрология, сертификатсия ва нозироти савдои ВМКБ, аъзои ситоди вилоятӣ зимни баргузории санҷиши назоратӣ дар бозори марказии шаҳри Хоруғ бо соҳибкорон ба мувофиқа расиданд, ки нархи як килограмм помирдор аз 17 ба 15 сомонӣ, бодиринг аз 6 ба 5 ва картошка аз 6 ба 4 сомонӣ поин фароварда шавад.
Алишер Мирзонаботов, муовини якуми раиси вилоят, масъулони раёсати стандартизатсия, метрология, сертификатсия ва нозироти савдо ва шуъбаи хадамоти зиддиинҳисории вилоятро муваззаф намуд, ки нархномаи маҳсулоти хӯроквориро аз соҳибкорону савдогарон талаб намоянд. Дар акси ҳол нисбат ба онҳо, ки талаботи меъёри давлатиро сарфи назар мекунанд, чораҳои қонунӣ андешида мешавад.
Назорати истифодаи ҳатмии ниқоб ва дастпӯшакҳои резинӣ барои савдогарону харидорон ва назорати сифати маҳсулот аз масъалаҳои дигари муҳими кори ситод арзёбӣ гардид.
Алишер Мирзонаботов ба хотири танзими нархи молу маҳсулоти хӯрокворӣ ва ҷиҳати ҷилавгирӣ аз сунъӣ боло рафтани арзиши маҳсулоти хӯрокворӣ дар ҳамаи ноҳияҳои вилоят таҳти раёсати раисони ноҳияҳо таъсис додани ситод оид ба танзими нарху наворо таъкид намуд.
Раҳмони ГУЛЗОР,
“Ҷумҳурият”
Баёни ақида (0) Санаи нашр: 15.05.2020 №: 93 Мутолиа карданд: 1009
