ҳуқуқ
ҚАРЗ БЕХОНААМ КАРД Ё ЧАРО СУД АРИЗАИ МАРО БА ИНОБАТ НАГИРИФТ?
Моҳи августи соли 2009 ба Ҷамъияти саҳомии пӯшидаи Ташкилоти амонатии қарзии хурди «Ҳамров» барои гирифтани қарз ба маблағи 150 ҳазор сомонӣ муроҷиат кардам ва барои ин як қисми ҳавлии манзили истиқоматиам, воқеъ дар шаҳри Душанбе, гузаргоҳи 2, кӯчаи Бӯстонро бо қитъаи 0,6 гектар замин ба гарав гузоштам. Вале ба ман ба ҷои 150 ҳазор сомонӣ 135 ҳазор сомонӣ, яъне 15 ҳазор кам доданд.
Тибқи ҷадвали пардохт, панҷ моҳи аввал пули бонкро баргардондам. Чун зарурате пеш омаду бояд ба хориҷ мерафтам, қарор додам, ки қисми багаравмондаро фурӯхта қарзи бонкро пурра пардохт намоям. Аммо раиси бонк бо далелҳое ба ин амр розӣ нашуд...
12 декабри соли 2012 бо ҳалномаи суди ноҳияи Шоҳмансури шаҳри Душанбе ҶСП “Ҳамров” - ро соҳибмулки манзили ман эътироф намуда, моро аз он ҷо кӯчонданд. Ҳол он ки қисми дуюми ҳавлии мазкур дар асоси қарори дахлдор аз 21 сентябри соли 1970 таҳти рақами 225 ба соҳибмулк С. Шарипов тааллуқ дорад. Бинобар ин, бояд шиносномаи техникии қисми гаравро ҷудо намуда, сипас қарори соҳибмулкии ҶСП “Ҳамров” - ро қабул мекарданд. Вале масъулони ҶСП “Ҳамров” ҳавлии мазкурро бе ягон ҳуҷҷати қонунӣ ба се қисм тақсим намуда, қисми гаравро аз қитъаи замин ва иморати соҳибмулк бо девор ҷудо намуда, ҳамаро фурӯхтанд.
Ҳалномаи дар боло зикршуда, 20 декабри соли 2013 бо таъйиноти Суди Олии Ҷумҳурии Тоҷикистон бекор шуд ва мебоист, ки он аз нав мавриди баррасӣ қарор мегирифт. Мутаассифона, он аз нав мавриди баррасӣ қарор нагирифта танҳо дар асоси ҳолатҳои навошкоршуда дида баромаданд, аммо бекор накарданд.
Дар ҳайратам, ки чаро суди ноҳияи Шоҳмансур аризаҳои маро аз рӯи ҳолатҳои нав ошкоршуда ба инобат нагирифт. Ман ду маротиба аз рӯи ҳолатҳои навошкоршуда ба суди ноҳияи Шоҳмансур ариза пешниҳод кардам, аммо аризаҳоям рад шуд. Ғайр аз ин, аризаҳои дигари ман ба воситаи Суди Олӣ ва суди шаҳри Душанбе ба суди ноҳияи Шоҳмансур ирсол гардида буд. Мутаассифона, судяи суди ноҳияи Шоҳмансур Д. Назарзода аризаҳои такрории маро ба инобат нагирифта, бекор гардидани ҳалномаро рад намуд.
Ман барои қисми багаравмондаи ҳавлии дарбаҳсбуда даъво надорам. Танҳо мехоҳам, ки қисмати дигари ҳавлии мазкур, ки ба ман тааллуқ дорад, баргардонда шавад. Зеро ин қисми ҳавлӣ ба гарав монда нашудааст ва ҶСП “Ҳамров” ғайриқонунӣ онро соҳиб гардидааст.
Сулаймон ШАРИФЗОДА, сокини шаҳри Душанбе
Баёни ақида (0) Санаи нашр: 18.05.2020 №: 94 Мутолиа карданд: 971
