иқтисод
«ҚУТОСПАРВАРӢ. НИЁЗҲОИ СОҲА НОБАРОВАРДА МОНДАНД»
Посух ба матлабе, ки 13 июни соли 2019 дар Нашрияи расмии Ҷумҳурии Тоҷикистон – «Ҷумҳурият» (№ 111) бо ин ном ба нашр расидааст.
Матлаби рӯзномаи «Ҷумҳурият» «Қутоспарварӣ. Ниёзҳои соҳа нобароварда монданд» дар Вазорати кишоварзӣ мавриди таҳлилу омӯзиш қарор гирифт. Дар ҳақиқат, тавре дар мақола омадааст, қутосҳо ба шароити иқлими ноҳияҳои баландкӯҳи ҷумҳурӣ мутобиқ буда, мавҷудияти чарогоҳҳои баландкӯҳ баҳри рушди соҳаи қутоспарварӣ мусоидат менамояд.
Мутобиқи маълумоти оморӣ, то 1 январи соли ҷорӣ дар ҳамаи шаклҳои хоҷагидории ҷумҳурӣ 27186 сар қутос мавҷуд аст, ки аз ин 8296 сар дар хоҷагиҳои ҷамъиятию деҳқонӣ ва 18890 сар дар бахши аҳолӣ мебошад. Саршумори қутос дар муқоиса ба ҳамин давраи соли гузашта 354 сар зиёд шудааст.
Тайи солҳои охир бо иқдом ва дастгирии Ҳукумати Ҷумҳурии Тоҷикистон мавқеи парвариши қутосҳо васеъ гардонда, зиёда аз 1250 сар қутос аз ноҳияи Мурғоби Вилояти Мухтори Кӯҳистони Бадахшон ба ноҳияҳои Балҷувон, Лахш, Сангвор, Кӯҳистони Мастчоҳ ва Айнӣ оварда шуданд ва ҳоло дар ин ҷойҳо парвариш меёбанд.
Айни замон дар 6 хоҷагии зотпарварии қутоспарварии ҷумҳурӣ 2115 сар қутос парвариш карда мешавад, ки нисбат ба ҳамин давраи соли гузашта 25 сар зиёд мебошад.
Воқеан, гӯшту шири қутос парҳезӣ ва баландсифат ба шумор мераванд. Дар таркиби гӯшти қутос холестерин кам аст.
Дар Барномаи маҷмӯавии рушди соҳаи чорводорӣ барои солҳои 2018-2020, ки бо Қарори Ҳукумати Ҷумҳурии Тоҷикистон аз 27.03.2018, № 160 тасдиқ гардидааст, мавқеи муҳим доштани рушди қутоспарварӣ таъкид шудааст. Вале аз рӯи таҳлилҳо, дар давраи амалишавии барнома барои харидорӣ намудани қутос ва ба дигар ноҳияҳои баландкӯҳи ҷумҳурӣ интиқол додани он аз ҳисоби буҷети ҷумҳурӣ маблағ пешбинӣ нагардидааст.
Барои рушди соҳаи қутоспарварӣ ва харидорӣ намудани қутос аз ҳисоби маблағҳои сармояи ватанию хориҷӣ мақомоти иҷроияи ҳокимияти давлатии вилоятҳо, шаҳру ноҳияҳои ҷумҳурӣ ва субъектҳои хоҷагидорӣ вазифадор гардидаанд.
Вазорат бо истифодаи имкониятҳои мавҷуда, ҷиҳати рушди соҳаи қутоспарварӣ дар оянда низ тадбирҳои зарурӣ меандешад.
Мирзозода Музаффар БУРҲОН,
муовини вазири кишоварзии
Ҷумҳурии Тоҷикистон
Баёни ақида (0) Санаи нашр: 18.05.2020 №: 94 Мутолиа карданд: 807
