фарҳанг
27 СОЛ. ВАҚТЕ ИНСОН КАСБАШРО ДӮСТ МЕДОРАД...
Мо бо Неъматулло Шарофов дар шуъбаи ҷарроҳии беморхонаи марказии ноҳия, аниқтараш, дар ҳуҷраи кориаш вохӯрдем. Ӯ бо як самимияти хос моро пешвоз гирифт. Дар чеҳрааш ҳушҳолиро дидем ва сабабашро пурсон гаштем.
- Хурсандиам сабаб дорад, - ба нақл оғоз намуд ҳамсуҳбатамон. - Зани бемореро, ки дар ҳолати ниҳоят вазнин қарор дошт, наздикону пайвандонаш аз зинда мондани ӯ умедашонро канда буданд, ҷарроҳӣ намудем. Дар гурдаи ӯ баробари тухми кабутар санге буд. Ҷарроҳӣ чор - панҷ соат давом карда бошад ҳам, шукри Худо, бомуваффақият анҷом ёфт. Фарзандону хешу ақрабояш аз зинда мондани ин модар ашки шодӣ мерехтанд. Шодиву тараби онҳо ҳеҷ аз пеши назарам дур намешавад. Ҳазорон бор шукр мегӯям, ки бо ин пеша баҳри ҳифзи саломатии миллати азизам саҳми хоксорона мегузорам...
Неъматулло Шарофов 4 марти соли 1968 дар шаҳраки Муъминобод дар оилаи хизматчӣ ба дунё омадааст. Меҳри табиб шудан дар қалби ӯ ҳангоми таҳсил дар мактаби миёна тавлид шуд. Ҳамин тавр, ҳуҷҷатҳояшро ба Донишгоҳи давлатии тиббии Тоҷикистон ба номи Абуалӣ ибни Сино супурда, пас аз як соли таҳсил ба сафи Қувваҳои Мусаллаҳи ИҶШС рафта, 2 сол хизмати Ватан – Модарро сарбаландона адо намуд ва пас аз бозгашт боз таҳсилро дар донишгоҳи мазкур идома бахшид. Соли 1993 баъди омӯхтани касби пурифтихори дармонбахшӣ, ба ҳайси ҷарроҳ дар маркази саломатии ноҳия ба кор даромад ва то имрӯз бо ин муассиса содиқ монд. Ӯ дар ин даргоҳ вазифаҳои гуногуну пурмасъулиятрро бар душ дошту бовуҷуди серкорӣ пайваста ба омӯзиши навгониҳои соҳа машғул мешуд. Неъматулло Шарофов дар баробари хатми зинаи ординатураи Донишгоҳи тиббии мамлакат таҷрибаю малкаи зиёд андӯхтааст. Ҳоло вай устоди кори хеш мебошад.
Дар 27 соли фаъолияти табибӣ Неъматулло зиёда аз 1000 амалиёти ҷарроҳӣ анҷом додааст. “Аз ҳама хотирмонаш ҷарроҳии талхадони зане буд, ки аз он 272 санг гирифтем. Хушбахтона, он зан шифо ёфту ба назди фарзандонаш сиҳат баргашт”, - иброз медорад ӯ.
Хизматҳои Неъматулло бо мукофоту сипосномаҳои зиёд қадр гаштааст. “Лекин барои ман аз ҳама мукофоти пурарзиш ихлос, қадрдонӣ ва меҳру муҳаббати мардум, иззату икроми онҳост”, - мегӯяд ҳамсуҳбатамон.
Исмоил ҶАБИНЗОДА, рӯзноманигор
Баёни ақида (0) Санаи нашр: 21.05.2020 №: 96 Мутолиа карданд: 699
