ҳуқуқ
COVID -19. ВКД ДАР МУБОРИЗА АЛАЙҲИ ОН НАҚШИ ФАЪОЛ ДОРАД
Воқеан, ба рағми пешбиниҳои нотавонбинони гурӯҳу доираҳои фурсатталаб ва ҳангомаҷӯ Ҳукумати мамлакат зарфиятҳоеро ба кор андохт, ки дар муддати кӯтоҳ хуруҷи вируси ҳамагири COVID-19 пешгирӣ ва гирифторони маризӣ сари вақт табобат шуданд. Хушбахтона, дар мубориза бо ин вабо тамоми сохторҳо дар пайравии Пешвои муаззами миллат вориди корзор шуданд ва ҳар кадом дар пешгирӣ ва коҳиши маризӣ нақше гузоштанд. Вазорати корҳои дохилӣ ҳамчун ниҳоди калидии ҳифзи ҳуқуқ дар сафи пеши мубориза бо COVID-19 қарор гирифт.
Ҳанӯз аз рӯзҳои аввали расман сабт шудани беморӣ дар ҷумҳурӣ вазорат аз ҳисоби кормандони худ гурӯҳҳои корӣ таъсис дода, бо шаҳрвандон дар манзилҳои истиқоматиашон дидору вохӯриҳо доир карда, оид ба пешгирии сирояти коронавирус ва худдорӣ намудан аз гаштугузор дар ҷойҳои ҷамъиятӣ корҳои фаҳмондадиҳӣ гузаронданд ва ин амал то ҳол идома дорад.
Ҷиҳати поксозӣ ва безараргардонии ҷойҳои ҷамъиятӣ дар шуъбаи махсуси карантинии милитсияи ВКД дастаҳои тамйизкунӣ ташкил шудааст, ки дар ҷузъу томҳои мақомоти корҳои дохилӣ ва ҷойҳои ҷамъиятӣ, хиёбону гулгашт, боғу майдонҳои пойтахт ва дигар шаҳру ноҳияҳо бо истифода аз маҳлулҳои биохимиявӣ чорабиниҳои безараргардонӣ доир намуда истодаанд. Ҳамчунин, аз ҳисоби кормандони шуъбаи мазкур, Сарраёсати Хадамоти давлатии оташнишонӣ (СХДО), Дастаи таъйиноти махсуси милитсия (ДТММ), Раёсати экологӣ ва сайёҳӣ ва кормандони дигар ҷузъу томҳо гурӯҳҳои доимоамалкунанда таъсис ёфтаанд, ки ҳамарӯза дар ҳудуди шаҳри Душанбе ва дигар шаҳру ноҳияҳо бо мақсади пешгирии паҳншавии бемориҳои сироятӣ тавассути воситаҳои нақлиёти махсус ва таҷҳизоти зарурӣ бо истифода аз моддаҳои биохимиявӣ чорабиниҳои безараргардонӣ доир менамоянд.
Ҳамарӯза воситаҳои нақлиёти махсуси СХДО ва ДТММ бо ҳамаи таҷҳизоти зарурӣ ва моддаҳои поксозиву безараргардонӣ муҷаҳҳаз гардида, барои поксозии майдонҳои истироҳатӣ роҳраву гулгаштҳо сафарбар мегарданд. Кормандоне, ки ба гурӯҳҳои доимоамалкунанда шомиланд, бо либосу дастпӯшҳои зарурӣ ва моддаҳои кимиёии безараргардонӣ таъмин карда шудаанд. Чорабиниҳои кимиёии пешгирикунандаи зидди бемории коронавирус шабонгоҳ анҷом дода мешаванд, то ки истироҳат, сайру гашт ва фароғати шаҳрвандон халалдор нагардад.
Инчунин, дар корхонаи дӯзандагии Раёсати таъминоти моддӣ-техникӣ ва низомии вазорат дӯхтани ниқобҳои муҳофизатӣ ба роҳ монда шуда, то имрӯз аз ҷониби кормандони ин корхона зиёда аз сад ҳазор ниқоби муҳофизатӣ дӯхта ва ба мавзеъҳои карантинӣ ирсол гардидааст.
Дар пайравӣ ба ташаббуси навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вазири корҳои дохилӣ Рамазон Раҳимзода ва ҳайати роҳбарикунандаи мақомоти корҳои дохилӣ 50 дарсади моҳонаи худро ҳамчун кумак ба фонди маблағгузории пандемияи COVID-19 гузаронданд.
Дармонгоҳи тиббии вазорат бо таҷҳизоту дастгоҳҳои замонавии ташхиси бемориҳои сироятӣ таъмин аст. Табибони дармонгоҳ хизматрасонии тиббиро шабонарӯзӣ бо таъмини дорувориҳои хушсифат ба роҳ мондаанд. Онҳо дар навбати худ бо маоши иловагӣ, се вақт хӯроки гарм, меваю сабзавот, либосҳои махсуси зиддисироятӣ, дастгоҳҳои либосшӯӣ ва ҳуҷраҳои алоҳидаи хоб таъминанд ва дар ҳолати хуби омодагӣ қарор доранд.
Бо супориши вазири корҳои дохилӣ барои беҳтар ва сари вақт анҷом додани хизматрасониҳои тиббӣ иловатан ба раёсати тиббӣ се автомашинаи сабукрави хизматии тиббӣ дастрас шуд.
Ҳадаф аз чорабиниҳои мақсадноки вазорат он аст, ки пеши роҳи паҳншавии ҳамагуна касалиҳои сироятӣ минбаъд низ гирифта шавад.
Дар ин бора Нусратулло Маҳмадзода, сардори маркази матбуоти Вазорати корҳои дохилӣ, подполковники милитсия, ба рӯзномаи «Ҷумҳурият» иттилоъ дод.
Мунаввари САФАР, «Ҷумҳурият»
Баёни ақида (0) Санаи нашр: 05.06.2020 №: 105 Мутолиа карданд: 996
