иқтисод
ТОҶИКИСТОН. ҲИФЗИ БОИГАРИҲОИ МИЛЛӢ ҲИФЗИ МИЛЛАТ АСТ!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста таъкид менамоянд, ки Ватанро сидқан дӯст дорем, ба қадри он бирасем, сарватҳои табиатро чун гавҳараки чашм ҳифз намоем. Яке аз боигариҳои кишвари биҳиштосоямон, ки дар Бадахшон, дар ҳудуди боғи миллии ноҳияи Ванҷ, дар саргаҳи рӯдхонаи Ванҷоб, дар наздикии қуллаҳои сарбаланди Исмоили Сомонӣ ҷойгир шудаанд, пиряхҳои азамати Федченко, Хирсон, Кашолаях ва Абдулқаҳҳор, инчунин, боз даҳҳо пиряхҳои хурду миёна мебошанд.
Ба гуфтаи директори боғи миллии ноҳия Розиқ Гиёев, аз оби мусаффое, ки аз баландиҳо ҷорӣ мегардад, аҳолии Осиёи Миёна ва Қазоқистон ба таври васеъ истифода мебаранд. Ҳамчунин, дар подомони пиряхҳо ҷангалҳо ва бешазорони зиёде сабзидаанд. Ҳайвонот ва парандагони ноҳияҳои Ванҷ, Мурғоб ва Рӯшон хеле нодир мебошанд.
Дар ин ҳудуди дилнавоз садҳо намуди рустанӣ ва гиёҳҳои гуногун мерӯянд, ки хусусияти шифобахшии онҳоро олимони табиатшинос, пеш аз ҳама, кормандони Институти биологии Помири Академияи миллии илмҳои Ҷумҳурии Тоҷикистон ва табибони гиёҳшинос исбот кардаанд. Дар ҳудуди боғи миллӣ ҳазорҳо дарахтони себу нок, чормағз, буттаҳои ангату гулхор ва зелол нашъунамо доранд, ки аз меваи онҳо дар корхонаи таъсисдодаи бонуи ташаббускор Васила Ғафурова, ки дар деҳаи Ғуҷоваст воқеъ гардидааст имрӯзҳо фарзандон ва шогирдонаш равғани ангат ва чормағз тайёр мекунанд, ки иқдоми шоиста мебошад.
Зикр бояд кард, ки боигариҳои Помир хеле зиёданд. Ҳоло ки фасли тобистон оғоз шудааст, фаъолият ва ташвишҳои кормандони боғи миллӣ ҳам зиёдтар мегардад. Пеш аз ҳама, онҳо намегузоранд, ки ба олами ҳайвонот ва парандагони нодири водии Ванҷи Боло, Вотхуд ва Язгулом зиён бирасад. Бо ин мақсад, дар ҳамдастӣ бо кормандони идораи хоҷагии ҷангал, ҷамоатҳои деҳоти Ҷовидон, Техарв, Язгулом, Вотхуд ва Рованд ва фаъолони маҳал саъю талош менамоянд, ки сарватҳои кӯҳистон пайваста фаровон шаванд.
Розиқ Гиёев иброз дошт, ки аз рӯи мушоҳидаҳои чандинсола маълум намудаанд, ки дар кӯҳсори назди қуллаи Исмоили Сомонӣ дар баробари даҳҳо ҳайвоноти ваҳшӣ 16 сар бабри барфӣ сукунат дорад. Ҳар яке аз ин ҷонварони зебо таҳти назорати доимии кормандони ниҳоди ҳифзи табиат қарор доранд.
Муҳаммадзоиршо ШАРИФЗОДА, «Ҷумҳурият»,
Сироншоҳи ДИЛОВАР, рӯзноманигор
Баёни ақида (0) Санаи нашр: 18.06.2020 №: 112 Мутолиа карданд: 878
