Хоҷагии деҳқонии «Қалъача» яке аз хоҷагиҳои пешқадам ба ҳисоб рафта, ҳамасола даҳҳо тонна помидорро пешниҳоди харидорон менамояд. 

Тибқи иттилои Аҳмад Ахмедов, роҳбари хоҷагӣ, имсол масоҳати кишти помидор 1 гектарро ташкил дода, ҳосили интизорӣ 50 тонна мебошад. 

Айни замон чиниш ҷараён дошта, ҳар помидор аз 500 грамм то 1,5 кило вазн дорад. Маҳсулоти истеҳсолшаванда дорои шакл ва таъми хос аст, зеро заминҳои ин минтақа аз оби мусаффои кӯҳҳои барфпӯш обёрӣ карда мешаванд.

Аъзои хоҷагӣ бо мақсади иҷрои дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон коркарди саноатии маҳсулотро низ ба роҳ мондаанд. Истеҳсоли афшура ва консерв аз помидорҳои хоҷагӣ имкон медиҳад, ки маҳсулоти тайёр ва аз ҷиҳати экологӣ тоза ба мизоҷон пешниҳод гардад.

Раҷаббой Аҳмадзода зимни боздид ба фаъолияти кишоварзони хоҷагӣ баҳои баланд дод ва аз онҳо даъват кард, ки ҳар ваҷаб заминро самаранок истифода бурда, барои баланд бардоштани ҳосилнокӣ аз тамоми имконият истифода намоянд.

Аҳолии деҳоти Овчиқалъача соли равон дар майдони 200 гектар навъҳои серҳосили помидорро кишт карда, дар таъмини бозори истеъмолӣ нақши назаррас гузошта истодаанд.

Дар ин бора ба хабарнигори «Ҷумҳурият» Музаффар Юнусов, сардори шуъбаи иттилоотию таҳлилии дастгоҳи раиси вилоят, хабар дод.