ҳуқуқ
ҶИНОЯТ ва ҶАЗО
ҒОРАТИ ШАҲРВАНДОН
Заминфурӯшон ба ҷавобгарӣ кашида шуданд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз оғози парвандаи ҷиноятӣ нисбат ба Амрулло Мирзоев ва Сино Юсупов, ки дар ҳамдастӣ бо дигарон аз шаҳрвандон бо ваъдаи ҷудо карда додани қитъаи замин маблағҳои калони пулӣ гирифтаанд, - хабар дод.
Тибқи иттилои маркази матбуоти агентӣ, Амрулло Мирзоев, корманди Хадамоти давлатии «Муҳофиза» - и Вазорати корҳои дохилӣ буда, дар асоси маслиҳати пешакӣ бо Сино Юсупов ва дигарон, моҳи апрели соли 2019 ба боварии шаҳрванд Дилноза Муродова даромада, аз ӯ барои ҳуҷҷатгузорӣ карда додани 0,07 гектар қитъаи замин, аз ҳисоби замини наздиҳавлигии шаҳрванд Ғ. Одинаев 203 000 сомонӣ талаб карда гирифтаанд. Онҳо ғайр аз ин, бо ҳамин тарзу усул ба шаҳрванд А. Гулов ба маблағи 44 000 сомонӣ ва ба А. Назруллоев ба миқдори 366 925 сомонӣ зарари махсусан калони моддӣ расонданд.
Манбаъ хабар медиҳад, ки ҳоло парвандаи ҷиноятӣ нисбат ба А. Мирзоев ва С. Юсупов бо моддаи 247 қисми 4 банди «б»-и Кодекси ҷиноятӣ (қаллобӣ ба миқдори махсусан калон) мавриди тафтиши пешакӣ қарор дорад.
МАСТӢ
Сокини Хуҷанд ба синаи фарзандаш ханҷар зад
Як сокини шаҳри Хуҷанд, ки сомонаи Вазорати корҳои дохилӣ аз ӯ марди 59-сола ном мебарад, ҳангоми мастӣ ба синаи писари худ корд задааст.
Бино ба иттилои ВКД, ҳоло ин мард аз сӯи кормандони мақомоти милитсия бо гумони расондани зарари вазнин ба саломатӣ дастгир шуда, писари 34-солааш бо ҷароҳатҳои вазнини ҷисмонӣ дар беморхона бистарӣ гардидааст. Ҳодиса нимаи дуюми 26 июн дар манзили истиқоматии гумонбар ва дар пайи истеъмоли машруботи спиртӣ ба амал омадааст.
Нисбат ба гумонбаршаванда бо моддаи 110 қисми 1-и Кодекси ҷиноятӣ (қасдан расондани зарари вазнин ба саломатӣ) парвандаи ҷиноятӣ оғоз шудааст, ки ин банди қонун аз панҷ то ҳашт соли зиндонро пешбинӣ менамояд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 01.07.2020 №: 120 Мутолиа карданд: 1262
