иқтисод
ВАҚТЕ ҶОМЕА СОЛИМ АСТ...
Тоҷикистон тавассути қонунҳои амалкунанда, хусусан Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон», ҳуқуқи шаҳрвандони худро ҳамчун истеъмолкунанда барои харидани моли дорои сифати хуб ва барои ҳаёту саломатӣ бехатар кафолат дода, сокинонро аз хариди ашёи пастсифате, ки ба вазъи иқтисодии онҳо созгор нест, ҳифз мекунад.
Ҳифзи солимии ҷомеа ва таъмини бехатарии онҳо аз истифодаи маводи истеъмолии зиёновар ба зиммаи сохтору ниҳодҳои гуногуни давлатӣ вогузор карда шудааст. Таъмини ҳамешагии мардум бо маҳсулоти босифати озуқаворӣ, пешгирӣ аз воридоту истеҳсоли маҳсулоти зиёновар яке аз вазифаҳои асосии Кумитаи бехатарии озуқавории назди Ҳукумати Ҷумҳурии Тоҷикистон маҳсуб меёбад.
Олимҷон Забирзода, мудири бахши иттилоот ва робита бо ҷомеаи кумита, иброз дошт, ки ҳоло ҷиҳати зери назорати қатъӣ қарор додани вазъи эпидемиологӣ вобаста ба бемории COVID - 19 ва таъмини чорабиниҳои пешгирикунанда аз ин беморӣ ситоди махсуси пешгирии паҳншавии коронавирус таъсис ёфта, барои фаъолияти босамари кормандони тамоми сохторҳои кумита дар вилоятҳо ва шаҳру ноҳияҳои ҷумҳурӣ, махсусан раёсати кумита дар сарҳади давлатӣ ва нақлиёт, нақшаи тадбирҳо таҳия ва роҳандозӣ шудааст.
Имрӯз тамоми молу маҳсулоте, ки аз хориҷи кишвар ворид мешаванд, ҳангоми воридот аз ҷониби раёсати кумита дар сарҳади давлатӣ ва нақлиёт таҳти санҷиш ва назорат қарор мегиранд. Танҳо пас аз муайян гардидани бехатарии маҳсулот ба ворид намудани он иҷозат дода мешавад. Инчунин, дар тамоми бозорҳои истеъмолии кишвар марказҳои бехатарии озуқавории кумита фаъолият мекунанд ва пеш аз фурӯши ҳама намуди маҳсулоти ғизоӣ бо мақсади таъмини бехатарии харидорон аз санҷиши доимӣ гузаронда мешаванд.
Гузарондани корҳои фаҳмондадиҳӣ бо мақсади баланд бардоштани маданияти харидуфурӯш ва маърифати истеъмолии шаҳрвандон яке аз вазифаҳои ҳамарӯзаи кормандони кумита ва зерсохторҳои он дар шаҳру ноҳияҳои ҷумҳурӣ мебошад. Аз ҷониби кормандони мақомоти бехатарии озуқаворӣ барои риояи гигиенаи шахсию ҷамъиятӣ ва баланд бардоштани маданияти харидуфурӯш дар ҳамкорӣ бо намояндагони ВАО - и кишвар, махсусан шабакаҳои телевизионию радио, ролику барнома, гузоришҳои хабарӣ ва мақолаҳо омода ва ба аҳолӣ пешниҳод карда мешаванд.
Хушбахтона, бо муттаҳидии аҳ-ли ҷомеа дар асоси роҳнамоиҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳоло шиддати бемории сироятии COVID-19 дар кишвар коҳиш ёфта истодааст. Бо вуҷуди ин, сокинони мамлакат бояд аз эҳтиёт ва риояи тавсияҳои табибон кор бигиранд. Барои паси сар намудани ин ҳолат саҳми ҳар як шаҳрванд басо муҳим аст. Ҳар як истеъмолкунанда бояд ҳангоми харидани молу маҳсулот ба санаи истеҳсол, ҳолати нигоҳдориву намуди зоҳирии он таваҷҷуҳ намояд. Ҳамчунин, тибқи гуфтаи мутахассисон ва табибон, нахуст ба гигиенаи тозагӣ риоя намуда, хонаву ҳавлӣ ва маҳалли худро тозаву озода нигоҳ доштан низ ҳатмист.
Матлубаи АБДУҚАҲҲОР,
«Ҷумҳурият»
Баёни ақида (0) Санаи нашр: 01.07.2020 №: 120 Мутолиа карданд: 637
