иқтисод
ХАТЛОН. СОДИРОТИ ИМТИЁЗИИ МАҲСУЛОТИ КИШОВАРЗӢ ВА СЕМЕНТ
Тайи шаш моҳи соли ҷорӣ КВД «Роҳи оҳани Тоҷикистон» дар вилояти Хатлон 1733 тонна маҳсулот, аз ҷумла 19 вагон пиёз (1140 тонна), 1 вагон сабзӣ (49 тонна) ба Қазоқистону Россия ва 8 вагон сементро (544 тонна) ба Ӯзбекистон содирот кардааст, - гуфт ба хабарнигори «Ҷумҳурият» Носирҷон Маъмурзода, мудири шуъбаи иттилоотию таҳлилии дастгоҳи раиси вилоят.
Дилшод Шарифзода, сардори истгоҳи роҳи оҳани Хатлон, зимни суҳбат гуфт, ки бо дастгирии Ҳукумати Ҷумҳурии Тоҷикистон бо мақсади рушди соҳибкорӣ, ҳавасмандсозии кишоварзону тоҷирони вилоят ва зиёд кардани ҳаҷми боркашонӣ тавассути роҳи оҳани минтақаи Хатлон - Амузанг, ҳамасола КВД «Роҳи оҳани Тоҷикистон» барои соҳибкорон ва интиқолдиҳандаҳо имтиёзҳо пешниҳод мекунад. Масалан, барои кашондани семент аз истгоҳи Ёвон то Амузанг тавассути нимвагон 60, вагони болопӯш 40 ва барои интиқоли пиёз ва маҳсулоти кишоварзии зудвайроншаванда аз ҳамаи истгоҳҳои вилоят 60 дарсад сабукӣ пешниҳод шудааст.
Инчунин, барои соҳибкорону ширкатҳои ватанӣ ҷиҳати интиқоли бори аз минтақаи Хатлон содиршаванда ва ба минтақаи Хатлон воридшаванда 40 дарсад сабукӣ, барои интиқоли бори транзитие, ки тавассути қаламрави Ҷумҳурии Ӯзбекистон мегузарад, дар вагонҳои инвентарӣ 40 ва дар вагонҳои шахсӣ 35 дарсад сабукӣ муқаррар шудааст.
- Кишоварзону саноатчиёни шаҳру навоҳии вилоят аз истгоҳҳои Бохтар, Ёвон, Шаҳритуз, Ҷалолиддини Балхӣ, Данғара ва Кӯлоб ҳангоми воридоту содироти маҳсулот метавонанд бе мушкилӣ аз ин имтиёзҳо истифода баранд, - гуфт Д. Шарифзода.
Кароматулло АТО,
«Ҷумҳурият»
Баёни ақида (0) Санаи нашр: 06.07.2020 №: 123 Мутолиа карданд: 1018
