ҳуқуқ
ҶИНОЯТ ВА ҶАЗО
ОДАМКУШӢ
Қотил 14 сол паси панҷара рафт
Бо ҳукми коллегияи судӣ оид ба парвандаҳои ҷиноятии суди вилояти Хатлон Нурмуҳаммад Нуров, ки дар содир намудани ҷинояти одамкушӣ гунаҳкор дониста мешавад, ба муҳлати 14 сол аз озодӣ маҳрум гардид.
Дар ин бора маркази матбуоти Прокуратураи генералӣ хабар дод. Тибқи иттилои манбаъ, маҳкумшуда дар пайи хусумати шахсӣ Хуршед Ғолибовро, ки мехост бо духтараш хонадор шавад, ба қатл расонд. Ҳодиса дар манзили истиқоматии Нурмуҳаммад Нуров ба амал омада, марҳум Х. Ғолибов бо зарби корд кушта шудааст.
Кирдори судшуда бо моддаи 104 қисми 1-и Кодекси ҷиноятӣ (одамкушӣ, яъне қасдан аз ҳаёт маҳрум сохтани дигар) бандубаст гардида, бо ҳукми суд Н. Нуров муҳлати адои ҷазоро дар муассисаи ислоҳии низомаш сахт сипарӣ хоҳад кард.
ЗАМИН
Раиси хоҷагӣ ба қаллобӣ айбдор мешавад
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ошкор шудани як ҳолати қаллобӣ бо истифода аз мақоми хизматӣ хабар дод.
Тибқи иттилои дафтари матбуоти агентӣ, Тоҳир Абдиев дар мақоми раиси хоҷагии деҳқонии ба номи Э. Умарови ноҳияи Деваштич фаъолият намуда, солҳои 2016 - 2020 аз шаҳрванд Ф. Нишонов барои ҷудо намуда додани 10,27 гектар қитъаи замин дар чанд маврид 28800 сомонӣ гирифтааст.
Вобаста ба ин ҳолат нисбат ба Т. Абдиев бо моддаи 247 қисми 2 бандҳои «в,г»-и Кодекси ҷиноятӣ (қаллобӣ бо расондани зарари ҷиддӣ ва истифода аз мақоми хизматӣ) парвандаи ҷиноятӣ оғоз гардида, тафтиши пешакӣ идома дорад.
БАНГДОНА
Набӣ Тошев барои кишти ғайриқонунӣ ҷавоб мегӯяд
Кормандони мақомоти милитсия дар шаҳри Панҷакент, дар доираи амалиёти «Кӯкнор-2020» дар боғчаи наздиҳавлигии Набӣ Тошев, сокини шаҳр, 14 бех рустании бангдонаро дарёфт ва решакан карданд.
Бино ба иттилои сомонаи ВКД, кормандони милитсия дақиқ карданд, ки Н. Тошев, истиқоматкунандаи кӯчаи Робеаи Балхӣ № 98-и шаҳр, рустании бангдонаро бо нигоҳубини махсуси агротехникӣ парвариш намудааст.
Ҳоло барои чунин амали ғайриқонунӣ нисбат ба Н. Тошев бо моддаи 204 Кодекси ҷиноятӣ (парвариши ғайриқонунии зироатҳои дорои моддаҳои нашъадори кишташон манъшуда) парвандаи ҷиноятӣ оғоз гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 07.07.2020 №: 124 - 125 Мутолиа карданд: 1211
