иқтисод
“ТОҶИКСТАНДАРТ”. ТАВСИЯҲОИ МЕЪЁРӢ БА МУАССИСАҲОИ ХИЗМАТРАСОНӢ
Агентии “Тоҷикстандарт” дар робита ба татбиқи нақшаи чорабиниҳо оид ба пурзӯр намудани чораҳои зиддиэпидемикӣ дар давраи COVID - 19 дар ҷумҳурӣ бо мақсади пешгирӣ аз паҳншавии сирояти ин беморӣ ҳуҷҷатҳои меъёрии «Роҳнамо барои фаъолияти нуқтаҳои хизматрасонӣ оид ба пешгирӣ аз сироятшавӣ ва паҳншавии бемории COVID-19» ва «Роҳнамо барои фаъолияти кошонаҳои ҳусн ва сартарошхонаҳо оид ба пешгирӣ аз сироятёбӣ ва паҳншавии бемории коронавирус COVID-19» - ро таҳия намуд.
Ҳуҷҷатҳои меъёрии мазкур барои истифода дар нуқтаҳои хӯроки умумӣ, савдо, кошонаҳои ҳусн ва сартарошхонаҳо пешбинӣ шуда, дар заминаи риояи қоидаҳои беҳдоштӣ тавсияҳои мушаххасро дар бар мегиранд ва барои фаъолияти бонизоми муассисаҳои хизматрасонӣ дар ин давра мусоидат менамоянд.
Ҳамчунин, дар асоси супориши Ҳукумати мамлакат бо мақсади муқаррар намудани меъёрҳои сифатӣ ҳангоми истеҳсол аз ҷониби мутахассисони агентӣ якҷо бо масъулони вазоратҳои саноат ва технологияҳои нав, тандурустӣ ва ҳифзи иҷтимоии аҳолии Ҷумҳурии Тоҷикистон масъалаҳои тақвияти истеҳсоли ниқоб, либосҳои махсуси ҳимоявӣ ва маводи антисептикӣ ҷиҳати пешгирии паҳншавии бемории сироятии COVID-19 мавриди омӯзиш ва тадбирандешӣ қарор гирифтанд. Дар муҳлати кӯтоҳ лоиҳаҳои шартҳои техникии Ҷумҳурии Тоҷикистон “Ниқобҳои таъйиноти гигиенӣ, муҳофизатӣ ва маишии истеҳсолӣ - ШТ 8400 ҶТ 030000230 - 001-2020”, “Маҳлулҳои антисептикӣ - ШТ 9182 ҶТ 030000230 - 002-2020” ва “Комбинезонҳо ва либосҳои болопӯши таъйиноти муҳофизатии истеҳсолӣ - ШТ 8570 ҶТ 030000230 - 003-2020” таҳия, қабул ва барои корбарӣ ба муассисаву корхонаҳои марбута пешниҳод гардиданд.
Бо мақсади дастгирии корхонаҳои истеҳсолӣ дар самти дӯхти ниқобҳои ҳимоявӣ, истеҳсоли маҳлулҳои безараргардонӣ ва либоси махсуси ҳимоявӣ ҳуҷҷатҳои мазкур барои истифода дар истеҳсолот ба марказҳои зертобеъ ройгон дастрас карда шуданд. Айни ҳол дар асоси талаботи муқаррарнамудаи ин ҳуҷҷатҳои меъёрии техникӣ гузарондани корҳои фаҳмондадиҳӣ дар корхонаҳои истеҳсолӣ идома дорад.
Агентии “Тоҷикстандарт” тасмим гирифтааст, ки минбаъд низ ҷиҳати дастгирии корхонаҳои истеҳсолӣ дар самти дӯхти ниқобҳои ҳимоявӣ, истеҳсоли маҳлулҳои безараргардонӣ ва либоси махсуси ҳимоявӣ барои пешгирии паҳншавии бемориҳои сироятӣ дар ҳамкорӣ бо вазорату идораҳои дахлдор чораҳои муассири амалӣ андешад.
Матлубаи АБДУҚАҲҲОР,
“Ҷумҳурият”
Баёни ақида (0) Санаи нашр: 16.07.2020 №: 132 Мутолиа карданд: 565
