сиёсат
ТОҶИКИСТОН. КОХИ СУЛҲИ МО БЕГАЗАНД АСТ
Дар шароити басо ҳассоси ҷаҳонӣ зархаридони хориҷӣ дар сар фикри молу мансаб ва андешаҳои заҳрогин мепарваранд ва тамоми ҳодисаҳои дар Тоҷикистон бавуқӯъомадаро нодуруст шарҳ дода, фазои осудаву осоиштаи мамлакатро гардолуд намудан мехоҳанд.
Ин навбат онҳо дар атрофи аъзои Маҷлиси миллии Маҷлиси Олии Ҷумҳурии Тоҷикистон интихоб шудани чанд нафар мутахассисони пуртаҷриба ҳангомаҳо барпо кардан хостанд.
Бо соҳиб шудани бештари овозҳои аъзои Маҷлиси миллӣ ба мақоми Раиси Маҷлиси миллии Маҷлиси Олии Ҷумҳурии Тоҷикистон интихоб шудани Рустами Эмомалӣ барои мо як падидаи бисёр фараҳбахш ба шумор меравад, аммо зархаридони хориҷиро ба ғазаб овардааст. Ҳарчанд барои пешрафти минбаъдаи Тоҷикистон ин тадбир хеле муҳим мебошад, аммо ин омил ду - се ҳангомаҷӯи хориҷиро нороҳат кардааст.
Рустами Эмомалӣ зодаи замони истиқлолият аст ва бо фикру назари тоза аз насли калонсол тафовут дорад, ки ин ба манфиати гурӯҳҳои иғвогаре мисли террористони ҲНИ нест. Зеро онҳо ғайр аз бардурӯғ Худову расул гуфтан дигар чизеро сарфаҳм намераванд ва барои онҳо ба вазифаи роҳбарикунанда омадани ҷавони боистеъдоде чун Рустами Эмомалӣ як фоҷиа аст.
Рустами Эмомалӣ дар як муддати кӯтоҳ дар арсаи сиёсат ҳамчун роҳбари кордону бомаҳорат ном баровард. Ӯ дар мактаби сиёсие парварда шуд, ки барои миллати тоҷик сулҳ овард ва якпорчагии миллати тоҷикро таъмин кард. Симои шаҳри Душанбе маҳз бо кӯшишу заҳматҳои пайвастаи Рустами Эмомалӣ дигаргун гардида, ба як макони дилфиреб табдил ёфт. Бунёди садҳо биноҳои ҳозиразамон, боғу гулгаштҳо, роҳҳои бисёрқабата, майдончаҳои варзишӣ, марказҳои саломатӣ, боғчаҳо ва толорҳои замонавӣ ҳусни шаҳри Душанберо ба куллӣ тағйир доданд.
Мо боварии комил дорем, ки истифода шудани чунин таҷрибаи ғании корӣ дар Маҷлиси миллӣ барои ҳаёти сиёсии мамлакат бетаъсир нахоҳад монд. Ин гуна ташаббусҳо идомаи сиёсати ваҳдатгароёна буда, эътимоду боварӣ ба ҷавонон дар арсаи сиёсати вақт бори дигар ба он ишорат мекунад, ки барои ҷавонон шароити мусоиди корӣ фароҳам омадааст ва онҳо имрӯз лаёқати идораи сохторҳои роҳбарикунандаро доранд.
Тоҷикистон имрӯз арсаи татбиқи ташаббусҳои созанда аст ва мо ба Ҷашни бузурги 30 - солагии Истиқлолияти давлатӣ омодагӣ гирифта истодаем. Ҳарчанд душманони миллати мо бо ҳар роҳу васила ин равандро халалдор карданӣ мешаванд, аммо кохи бегазанди сулҳу ваҳдати мо дигар аз боду борон газанд нахоҳанд ёфт.
Ромиз АБДУЛЛОЕВ, сардори раёсати илм
ва инноватсияи Донишгоҳи давлатии Хуҷанд
ба номи академик Б. Ғафуров
Баёни ақида (0) Санаи нашр: 21.07.2020 №: 135 Мутолиа карданд: 752
