ҳуқуқ
ҶИНОЯТ ва ҶАЗО
КОРРУПСИЯ
Судя ҳангоми гирифтани пора ба даст афтод
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошт ва ба ҷавобгарии ҷиноятӣ кашидани судя хабар дод.
Тибқи иттилои маркази матбуоти агентӣ, Зайдулло Собирзода, судяи суди шаҳри Ҳисор, аз шаҳрванд «А» барои нисбаташ таъйин намудани ҷазои сабуктар 30000 сомонӣ ҳамчун пора талаб намуда, 12 апрели соли ҷорӣ аз ин маблағ 10000 сомониашро пешакӣ гирифтааст. Вале ҳангоми гирифтани маблағи боқимонда 14 апрели соли равон дар ҷойи ҳодиса дастгир шуд.
Вобаста ба ин ҳолат, нисбат ба Зайдулло Собирзода бо моддаи 319 қисми 3-и Кодекси ҷиноятӣ (гирифтани пора) парвандаи ҷиноятӣ оғоз гардида, тафтишоти пешакӣ идома дорад.
ДУЗДӢ
Милитсия ба дасти гумонбар завлона зад
Вазорати корҳои дохилӣ аз боздошти сокини ноҳияи Қубодиён хабар дод, ки ба содир намудани ҷинояти дуздӣ гумонбар мешавад.
Зайниддин Саидбеков (соли таваллудаш 1999) дар ҳудуди ноҳия тариқи шикастани қуфли дару терезаҳо вориди мағозаву дорухонаҳо шуда, асосан, маблағҳои пулиро ба яғмо бурдааст. Аз ҷумла, кормандони ШВКД дар ноҳия муайян кардаанд, ки номбурда шоми 2 июли соли равон бо чунин усул вориди дорухонаи марбут ба соҳибкор Баҳодур Қурбонов, воқеъ дар маркази ноҳия шуда, аз он ҷо 17 ҳазор сомониро тасарруф намудааст.
Тибқи иттилои манбаъ, З. Саидбеков дар панҷ ҳолат ба содир намудани ҷинояти дуздӣ гумонбар мешавад, ки ҳоло алайҳи ӯ бо моддаи 244 - и Кодекси ҷиноятӣ (дуздӣ) парвандаи ҷиноятӣ оғоз шудааст.
ҒОРАТГАРӢ
Яғмогари фирорӣ боздошт шуд
Кормандони мақомоти милитсия дар шаҳри Душанбе сокини пойтахтро, ки аз ӯ марди 30-сола ном бурда мешавад, ба гумони содир намудани кирдори ғоратгарӣ боздошт намуданд.
Тавре сомонаи ВКД хабар медиҳад, гумонбар пеш аз зуҳри 20 июл дар кӯчаи Р. Набиеви пойтахт ба ҷавонзани 22-сола дарафтода, 800 доллари амрикоӣ ва телефони мобилии ӯро тасарруф намуда, аз ҷойи ҳодиса ғайб задааст.
Дар умум, зарари аз ин амал расондашуда 9 ҳазору 100 сомонӣ ҳисоб карда мешавад, ки вобаста ба ин ҳолат тафтишот оғоз гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 23.07.2020 №: 137 Мутолиа карданд: 1111
