сиёсат
СУҲБАТИ ТЕЛЕФОНӢ
24 июл Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ анҷом доданд.
Зимни суҳбат Сарвари давлат Президенти Ӯзбекистони дӯстро ба муносибати ҷашни зодрӯзашон самимона табрику муборакбод гуфтанд.
Дар зимн, Пешвои миллат фаъолияти давлатии самараноки муҳтарам Шавкат Мирзиёевро ҷиҳати таъмини рушди иҷтимоию иқтисодии Ӯзбекистон ва таҳкими мавқеи он дар арсаи байналмилалӣ таъкид сохтанд. Президенти Тоҷикистон муҳтарам Эмомалӣ Раҳмон таҳаввулоти калонмиқёсеро, ки тайи солҳои ахир дар ин давлати ҳамсоя ба вуқӯъ пайвастаанд, баланд арзёбӣ карда, ба мардуми бародари Ӯзбекистон сулҳу суботи бардавом, некуаҳволӣ ва пешрафти доманадор орзу намуданд.
Ҳангоми баррасии мавзӯъҳои калидии муносибатҳои дуҷониба, тарафҳо алоқамандии худро ба рушди пайгиронаи робитаҳои ҳусни ҳамҷаворӣ ва ҳамкориҳои судманди гуногунҷанбаи Тоҷикистон ва Ӯзбекистон таъкид сохта, ҷиҳати пешбурди минбаъдаи шарикии стратегии ду кишвар дар фазои ҳамдигарфаҳмӣ ва эътимод изҳори омодагӣ карданд.
Дар робита ба ҳамкориҳои ду кишвар, дар заминаи муносибатҳои бисёрҷониба, тарафҳо ба масъалаҳои таъмини амният дар минтақа, аз ҷумла Афғонистон, таваҷҷуҳ зоҳир намуда, атрофи раванди нигаронкунандаи паҳншавии фарогири пандемияи коронавирус изҳори ақида карда, ҷиҳати вазъияте, ки дар ин замина имрӯз дар ду кишвар ба вуқӯъ пайвастааст, мубодилаи иттилоот анҷом доданд.
Президентҳо, ҳамчунин, як қатор дигар масъалаҳои мубрами байналмилалӣ ва ҳамкориҳои минтақавиро мавриди баррасӣ қарор доданд.
Баёни ақида (0) Санаи нашр: 27.07.2020 №: 139 Мутолиа карданд: 614
