иқтисод
КИШОВАРЗӢ. АЗ АФЗОИШИ ҲАҶМИ МАҲСУЛОТ ТО МУАММОИ МОҲИПАРВАРӢ
Зимни натиҷагирӣ аз фаъолияти шашмоҳаи Вазорати кишоварзӣ таъкид шуд, ки дар ин давра дар ҳамаи шаклҳои хоҷагидории ҷумҳурӣ ҳаҷми умумии истеҳсоли маҳсулоти кишоварзӣ наздики 9 миллиарду 394 миллион сомониро ташкил дод, ки нисбат ба ҳамин давраи соли гузашта 8,2 дарсад зиёд мебошад. Дар ин давра истеҳсоли ғалладона 606443, сабзавот 902607, полизӣ 243149, мева 123515, ангур 2148, гӯшт 80676, шир 366417, асал беш аз 616, моҳӣ 832, пашм 4762 тонна ва тухм наздики 444 миллион донаро ташкил дод. Ҳамчунин, 196815 тонна картошка ва 378 тонна пилла истеҳсол шуд, ки нисбат ба ҳамин давраи соли сипаришуда мутаносибан 22,2 ва 49,6 дарсад кам мебошад.
Дар майдони 389535 гектар ғалладона, 214050 гектар зироатҳои техникӣ, 58148 гектар картошка, 69886 гектар сабзавот, 22754 гектар полизӣ ва 102279 гектар зироатҳои хӯроки чорво кишт шуд. Нисбат ба ҳамин давраи соли гузашта масоҳати кишти ғалладона 5785, картошка 6392, сабзавот 2767 ва полизӣ 864 гектар зиёд шудааст.
Кишоварзони мамлакат барои таъмини фаровонҳосилӣ дар майдони 60858 гектар кишти такрорӣ гузаронданд, ки дар муқоиса бо ҳамин давраи соли гузашта қариб 3 ҳазор гектар бештар аст.
Бо мақсади баланд бардоштани иқтидори содиротии кишвар то 1 июли соли равон наздики 2115 гектар боғ ва 389 гектар токзор бунёд гардид. Дар баробари ин, беш аз 108 гектар боғи интенсивӣ сабз гашта, зиёда аз 1960 гектар боғу токзори куҳна барқарор шуд.
Бо вуҷуди паҳн гаштани бемории коронавирус, кишоварзон имкон пайдо карданд, ки маҳсулоташонро ба бозори хориҷи кишвар бароранд. Дар шашмоҳа 96447 тонна маҳсулоти рустанипарварӣ (ба маблағи 12650692 доллар) содирот шуд, ки нисбат ба ҳамин давраи соли гузашта 33,6 дарсад зиёд аст. Содироти пиёз наздики 44, меваи ситрусӣ 5, меваи хушк 9,4 ва гелос 8,3 дарсад афзуд.
Шумораи хоҷагиҳои моҳипарварӣ дар ҷумҳурӣ ба 352 адад расида, то ин давра беш аз 832 тонна моҳӣ истеҳсол шуд, ки дар қиёс ба ҳамин давраи соли гузашта 368 тонна зиёд мебошад.
Ба таъкиди муовини вазири кишоварзӣ Музаффар Мирзозода бо дастгирии Пешвои миллат аз нимаи дуюми соли 2019 дар соҳа имтиёзҳои андозию гумрукӣ мавриди амал қарор доранд. Дар пайи ин иқдом теъдоди хоҷагиҳо аз 300 ба 352 адад расида, истеҳсолот ҳам афзоиш ёфт. Мутаассифона, низоми соҳа ҳанӯз беҳбудиро талаб мекунад.
- 3 сол пеш дар назди вазорат барои муқаррар намудани меъёри сайди моҳӣ аз обанборҳои кишвар Шӯрои илмии истеҳсоли моҳидорӣ фаъолият мекард. Мутаассифона, ин шӯро аз байн рафт ва ҳоло дубора барқарор намудани он амри зарурист. Барои мисол, сайди яксолаи моҳӣ аз обанбори «Баҳри тоҷик» ҳамагӣ 150 тоннаро ташкил дод, ки хеле ночиз аст. Ҳол он ки тамоми бозорҳои ҷумҳурӣ аз ин обанбор бо суфмоҳӣ (судак) таъмин мешаванд, - гуфт ӯ.
Ба гуфтаи вазири кишоварзӣ Амонулло Салимзода, моҳипарварони вилояти Суғд, аллакай, парвариши интенсивии моҳиро ба роҳ мондаанд, ки натиҷаи хуб дода истодааст. Мутаассифона, раванди гузариш ба ин тарзи кор дар минтақаҳои дигари ҷумҳурӣ хеле суст аст. КВД «Моҳии Тоҷикистон» дар ин самт бояд тадбир андешад.
М. ҚОДИРОВА, «Ҷумҳурият»
Баёни ақида (0) Санаи нашр: 27.07.2020 №: 139 Мутолиа карданд: 588
