фарҳанг
ВАЗОРАТ ЧОРАҲОИ ЗАРУРӢ МЕАНДЕШАД
Мақолаи Мурод Ёров, ки дар рӯзномаи «Ҷумҳурият» аз 3 марти соли 2020 бо номи «Таърих. Агар пеши роҳи фориғболиро нагирем…» нашр шудааст, дар Вазорати фарҳанги Ҷумҳурии Тоҷикистон мавриди баррасӣ қарор гирифт.
Бояд гуфт, ки Вазорати фарҳанги кишвар ҳамчун мақоми ваколатдор дар самти ҳифз ва истифодаи мероси таърихию фарҳангӣ, барои тармиму барқарорнамоӣ, тарғибу ташвиқ ва тозаву озода нигоҳ доштани ҳудуди ёдгориҳои таърихию фарҳангӣ чорабиниҳои оммавиро на танҳо дар рӯзҳои ид, балки мунтазам ба роҳ мондааст. Ҳамзамон, нозирони ҳифзи ёдгориҳои таърихию фарҳангӣ дар маҳал, мудирони шуъбаҳои фарҳанг ва кормандони муассисаҳои тобеи вазорат, аз ҷумла муҷтамаъ ва мамнӯъгоҳҳо, ҳар се моҳ ба Ҳукумати Ҷумҳурии Тоҷикистон оид ба тозаву озода намудани ҳудуди ёдгориҳои таърихию фарҳангӣ, ниҳолшинонию кабудизоркунӣ ҳисобот пешниҳод менамоянд.
Мувофиқи нақшаи чорабиниҳои вазорат дар ҷумҳурӣ пайваста семинару машваратҳо гузаронда мешавад. Аз ҷумла, соли 2019 вазорат дар якҷоягӣ бо муассисаҳои соҳавӣ, дар маҷмӯъ, зиёда аз 60 чорабинии ҷумҳуриявӣ ва байналмилалиро дар самти ҳифз ва нигаҳдошти мероси ғайриманқул баргузор намуд, ки дар он нозирони ҳифзи ёдгориҳои таърихию фарҳангӣ, мутахассисону кормандони дахлдори кишвар ширкат доштанд.
Дар доираи Солҳои рушди деҳот, сайёҳӣ ва ҳунарҳои мардумӣ Кумитаи телевизион ва радиои назди Ҳукумати ҷумҳурӣ бо Вазорати фарҳанг ҳамкории доимӣ дошта, доир ба ёдгориҳои таърихию фарҳангии кишвар бо забонҳои тоҷикӣ, русӣ ва англисӣ филмҳои мустанад ва ролику барномаҳои тарғиботию ташвиқотӣ таҳия ва манзури тамошобинон намуда истодааст.
Албатта, баъзан норасоиҳо ба чашм мерасанд, аммо дастовардҳо бештаранд. Вобаста ба худсарона ғасб намудани ҳудуди ёдгориҳои таърихию фарҳангӣ, бо пешниҳоди вазорат танҳо соли 2019 аз ҷониби Прокуратураи генералии Ҷумҳурии Тоҷикистон 8 қарори мақомоти иҷроияи маҳаллӣ барои истифодаи замини ҳудуди ёдгориҳо бекор карда шуд. Вазорат дар ин самт бо мақомоти марбута ҳамкорӣ дошта, баҳри пешгирӣ аз несту нобудшавии мероси таърихию фарҳангӣ чораҳои зарурӣ андешида мешавад.
Зулфия ДАВЛАТЗОДА,вазири фарҳанги Ҷумҳурии Тоҷикистон
Баёни ақида (0) Санаи нашр: 27.07.2020 №: 139 Мутолиа карданд: 554
