ҳуқуқ
«ҲАЛНОМАИ БАҲСБАРАНГЕЗ Ё ЧАНД СУОЛИ БЕПОСУХ!»
Матлаби Мунаввари Сафар, ки дар рўзномаи «Ҷумҳурият» 21 майи соли 2020, № 96 таҳти унвони «Ҳалномаи баҳсбарангез ё чанд суоли бепосух!» ба нашр расидааст, дар Суди Олӣ мавриди омўзиш қарор дода шуд.
Муайян гардид, ки бо ҳалномаи суди шаҳри Турсунзода аз 17 июли соли 2019 даъвои Р. Бурханова ба ҷавобгарии С. Шукурова, шахси сеюм шуъбаи шиносномадиҳии ШВКД дар шаҳри Турсунзода ва идораи нотариалии давлатии шаҳри Турсунзода дар бораи беэътибор донистани ваколатнома рад гардидааст.
Ҳалномаи мазкур бо қарори коллегияи судӣ оид ба парвандаҳои граждании Суди Олӣ аз 9 октябри соли 2019 бетағйир гузошта шудааст.
Бо таъйиноти судяи Суди Олӣ аз 16 апрели соли 2020 ирсоли парванда барои моҳиятан баррасӣ намудани он дар суди марҳилаи назоратӣ рад шудааст.
Зимни омўзиши парванда муайян гашт, ки дар асоси ваколатнома аз 17 марти соли 2015, ки нотариуси шаҳри Москваи Федератсияи Россия тасдиқ намудааст, А. Эшназаров С. Шукуроваро барои намояндаи дар ҳамаи мақомоти давлатӣ, аз ҷумла дар судҳои Ҷумҳурии Тоҷикистон будан ваколатдор кардааст. Ваколатнома ба муҳлати се сол бо ҳуқуқи худро ба шахси дигар додан дода шудааст.
Инчунин, бо ваколатнома аз 10 октябри соли 2016 А. Эшназаров – С. Шукуроваро ваколатдор намудааст, ки дар ҳамаи мақомоти давлатӣ, аз ҷумла дар судҳои Ҷумҳурии Тоҷикистон намояндаи ў бошад. Ин ваколатнома ба муҳлати даҳ сол дода шуда, аз ҷониби нотариуси шаҳри Москваи Федератсияи Россия тасдиқ шудааст.
Оид ба ваҷҳи мақола дар хусуси он ки шахсияти А. Эшназаров аз ҷониби суд муайян карда нашудааст, қайд менамоем, ки чуноне аз маводи парванда бармеояд шахсияти А. Эшназаров дар маҷлиси судӣ марҳилаҳои якум ва кассатсионӣ тибқи талаботи қисми 2 моддаи 164 Кодекси мурофиавии граждании Ҷумҳурии Тоҷикистон муайян карда шудааст.
Тибқи талаботи моддаи 365 кодекси зикршуда нисбат ба санадҳои судии эътибори қонунӣ пайдокарда, ба суди марҳилаи назоратӣ аз ҷониби шахсони иштирокчии парванда ва дигар шахсон, ки агар ҳуқуқ ва манфиатҳои қонунии онҳо бо санадҳои судии қабулкардаи суд вайрон гардида бошад, мумкин аст бо тартиби муқаррарнамудаи ҳамин боб шикояти назоратӣ пешниҳод карда шавад.
Аз ин рў, Р. Бурханова нисбат ба санадҳои судии зикргардида метавонад, бо риояи талаботи Кодекси мурофиавии граждании Ҷумҳурии Тоҷикистон ба Суди Олӣ бо шикояти назоратӣ муроҷиат намояд.
А. ИСҲОҚӢ, муовини раиси Суди Олӣ
Баёни ақида (0) Санаи нашр: 29.07.2020 №: 141 Мутолиа карданд: 1022
