фарҳанг
МУАЛЛИФ ҲАҚ АСТ. КАМБУДИҲО БАРТАРАФ МЕШАВАНД
Дар бахши раёсати фарҳанги мақомоти иҷроияи ҳокимияти давлатии вилояти Хатлон дар минтақаи Кӯлоб мақолаи Сарвиноз Шодмонова таҳти унвони «Маърифат. Вақте китобхона ҳоли табоҳ дорад...», ки дар рӯзномаи «Ҷумҳурият» 30 марти соли 2020 ба табъ расидааст, мавриди омӯзиш қарор дода шуд.
Санҷиш нишон дод, ки филиал – китобхонаҳои №№16, 17 ва 19 – и деҳаҳои Тоқакаппа, Мирапоқ ва Хонаободи деҳоти Даҳана дар тавозуни бахши фарҳанги мақомоти иҷроияи ҳокимияти давлатии шаҳри Кӯлоб қарор доранд. Хазинаи китобии филиал – китобхонаҳои номбурда, дар маҷмӯъ, 12001 нусхаро ташкил намуда, солҳои тӯлонӣ ба мардум хизмат мерасонанд.
Тавре дар мақола зикр гардидааст, айни замон бинои муассисаҳои мазкур дар ҳолати корношоямӣ қарор дошта, солҳо рӯи таъмири асосиро надидаанд ва фаъолияти минбаъдаи онҳо имконнопазир аст. Мувофиқи мақсад мебуд биноҳои ин китобхонаҳо азнавсозӣ карда мешуд.
Бо вуҷуди камбудиҳои дар боло зикргардида, кормандони соҳаи фарҳанги деҳоти Даҳана фаъолияти худро дар асоси сиёсати фарҳангии Ҳукумати ҷумҳурӣ ба роҳ монда, чорабиниҳои фарҳангиро дар ҳамбастагӣ бо муассисаҳои таълимӣ ва дигар ташкилотҳо баргузор менамояд, дар озмуну дигар чорабиниҳои сатҳи шаҳрӣ ва вилоятӣ иштироки фаъолона доранд.
Имрӯзҳо ба истиқболи Ҷашни 30 – солагии Истиқлолияти давлатии Ҷумҳурии Тоҷикистон сохтмони иншооти фарҳангӣ дар тамоми гӯшаю канори Ватани азизамон рафта истодааст. Тибқи нақша бинои филиал – китобхонаҳои деҳаҳои Тоқакаппа, Мирапоқ ва Хонаободи деҳоти Даҳана то ин ҷашни умумимиллӣ аз ҳисоби маблағҳои маҳаллӣ, дастгирии соҳибкорон ва дар ҳамкорӣ бо аҳолӣ таъмири асосӣ ва навсозӣ мешаванд.
А. ОДИНАЕВ,
мудири бахши раёсати фарҳанги мақомоти иҷроияи
ҳокимияти давлатии вилояти Хатлон дар минтақаи Кӯлоб
Баёни ақида (0) Санаи нашр: 04.08.2020 №: 144 Мутолиа карданд: 794
