иқтисод
САНГВОР. НАҚШИ ЯК НОҲИЯ ДАР ТАЪМИНИ АМНИЯТИ ОЗУҚАВОРӢ
Кишоварзони ноҳияи Сангвор бо мақсади истеҳсоли барзиёди маҳсулот дар ҳамаи шаклҳои хоҷагидорӣ дар 3 ҳазору 11 гектар картошкаву ғалла ва зироатҳои полизӣ кошта, 16 гектар боғи нав бунёд карданд.
Тавре Акбар Иззатов, сардори раёсати кишоварзии ноҳия, зимни суҳбат бо хабарнигори «Ҷумҳурият» гуфт, асоси иқтисодиёти ноҳияро соҳаи кишоварзӣ ташкил медиҳад, аз ин рӯ, аҳли заҳмати ноҳия баҳри зиёд кардани истеҳсоли мева, ғалла, картошка, сабзавот, гӯшт, асал ва маҳсулоти дигари кишоварзӣ аз имкониятҳои мавҷуда оқилонаву самаранок истифода мебаранд.
Ба гуфтаи ӯ, кишоварзони ноҳия имсол дар партави ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади боз ҳам афзоиш додани ҳаҷми истеҳсол майдони кишти картошкаро аз ҳисоби заминҳои бекорхобида ва чарогоҳҳо 300 гектар зиёд намуданд.
Ҳаҷми истеҳсоли мева аз майдони 821 гектар боғ ҳамасола афзуда, ҳамзамон, бо мақсади зиёд намудани истеҳсоли меваи хушсифат боғҳои замонавӣ бунёд шуда истодаанд. Деҳқонон аз замини боғҳо самаранок истифода бурда, дар байни қаторҳои ниҳолҳо зироатҳои полизӣ кишт мекунанд, то эҳтиёҷоти хонаводаи худро бо маҳсулоти кишоварзӣ таъмин намоянд.
Соҳаи дигари пешбарандаи иқтисоди ноҳия занбӯриасалпарварӣ ба шумор рафта, соли сипаришуда занбӯриасалпарварони ноҳия аз ҳисоби нигоҳубини хуби 12 ҳазору 960 оила беш аз 300 тонна асали хушсифат истеҳсол карданд.
- Сокинони ноҳия ҷидду ҷаҳд доранд, ки аз имкониятҳои мавҷуда оқилона истифода бурда, ба афзоиши бештари маҳсулоти хушсифат ноил шаванд ва ба ин васила дар таъмини амнияти озуқавории кишвари азизамон саҳми арзанда гузоранд, - гуфт А. Иззатов.
Худодод ЗАЙНИДДИН, «Ҷумҳурият»
Баёни ақида (0) Санаи нашр: 05.08.2020 №: 145 Мутолиа карданд: 903
