фарҳанг
АЗ РАШТ ТО ДУШАНБЕ. ИҚДОМОТИ СОҲИБКОР МУШКИЛОТИ МАРДУМРО ҲАЛ НАМУД
Фазои орому осуда ва дастгириҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳибкоронро водор месозанд, ки аз корҳои хайру савоб пайравӣ намуда, иқдомҳои хайрхоҳонаро пеш гирифтанд.
Ба наздикӣ дар ноҳияи Рашт аз ҷониби соҳибкорони маҳаллӣ чанд иншооти хурду миёна ба истифода супурда шуд. Аз ҷумла, бо ташаббуси соҳибкор Ғаюр Ҷӯрабеков ва фарзандони ба ору номуси ин марди саховатпеша, ки худро дар самти корҳои ободонию бунёдкорӣ пайрави Пешвои миллат меҳисобад, дар деҳаи Дуобаи Ҷамоати деҳоти Тагоба, корҳои назаррасе ба анҷом расонда шуданд. Соҳибкори муваффақ бо фарзандон дар барқарорсозӣ ва асфалтпӯш кардани роҳҳо, кандани чоҳҳои амудӣ ва бо қувваи барқ таъмин намудани сокинон саҳми муносиб гузошт.
Роҳи байни деҳаҳои Дуобаву Каландаки ноҳияи Рашт, ки ин ду деҳаро ба маркази ноҳия мепайвандад, ба таъмиру тармим ниёз дошт, бо ташаббуси ин марди саховатпеша бо маблағи 1 миллиону 200 ҳазор сомонӣ мумфарш гардид. Ҳамчунин, бо маблағи 71 ҳазор сомонӣ дар деҳаи Дуоба як трансформатор бо 10 симчӯб шинонд, ки айни замон мавриди истифода қарор дорад.
Соҳибкори муваффақ дар деҳаи Гулпарвари Ҷамоати деҳоти Чимтеппаи шаҳри Душанбе низ дар масофаи 4 километр роҳро мумфарш карда, аз чуқурии 85 метр бо маблағи 100 ҳазор сомонӣ барои сокинони он об баровард. Илова бар ин, як трансформатор барои сокинони деҳаи Гулпарвар бо симчӯбҳо ба маблағи 68 ҳазор сомонӣ харида, баъди васлу насб ба истифода дод.
Дар ноҳияи Абдураҳмони Ҷомӣ бо маблағгузории ӯ аз чуқурии 130 метр оби нӯшокӣ барои 300 хоҷагӣ бароварда шудааст, ки маблағи умумии он 250 ҳазор сомониро дар бар мегирад.
Дар пайравӣ ба иқдомҳои хайрхоҳонаи Пешвои миллат соҳибкор Ғаюр Ҷӯрабеков ба табибони Рашт либос, доруворӣ ва маводи зиддиуфунӣ ба маблағи 50 ҳазор сомонӣ туҳфа намуд.
Айни замон бо иқдоми ин соҳибкор барои истироҳат ва фароғати ҷавонон ва сайёҳони дохилию хориҷӣ дар яке аз мавзеъҳои тамошобоби Ҷамоати деҳоти Тагоба сохтмони ҳавзҳои моҳигирӣ, шиноварӣ ва дигар инфрасохтори сайёҳӣ бомаром идома дорад.
Дилшод АМИРОВ, «Ҷумҳурият»
Баёни ақида (0) Санаи нашр: 16.09.2020 №: 177 Мутолиа карданд: 921
