сиёсат
ТАҚВИЯТИ ҲАМКОРИҲО МАТРАҲ ШУД
Раиси вилояти Хатлон Қурбон Ҳакимзода сафири фавқулода ва мухтори Ҷумҳурии Қазоқистон дар Тоҷикистон Аскар Тоҷибоевро ба ҳузур пазируфт. Дар ин бора аз шуъбаи иттилоотӣ-таҳлилии мақомоти иҷроияи ҳокимияти давлатии вилояти Хатлон хабар доданд.
Қурбон Ҳакимзода зикр намуд, ки вилояти Хатлон аз калонтарин минтақаҳои кишоварзии мамлакат ба шумор рафта, шуғли асосии мардум кишоварзӣ, боғдорӣ, обчакорӣ, чорвопарварӣ ва пахтакорӣ мебошад. Аз ин рӯ, барои ҳар ду кишвар рушди ҳамкорӣ дар самти бунёди гармхонаҳо ҷиҳати парвариши сабзавоти барвақтӣ, таъсиси корхонаҳои хурди коркарди меваю сабзавот бо истифода аз фанноварии муосир ва содироти консервҳои меваю сабзавот ба Қазоқистон, сохтани корхонаҳои муштарак оид ба коркарди шир, гандум, пашм ва чарм муҳим мебошад.
Аскар Тоҷибоев иброз дошт, ки Қазоқистону Тоҷикистон тайи чанд сол дар бахшҳои гуногун ҳамкории зич дошта, дар соҳаҳои маориф, тандурустӣ, сайёҳӣ ва содироту воридоти маҳсулоти кишоварзӣ таҷрибаи хуб ҳосил кардаанд. Дар ин замина, Қазоқистон нақшаҳои нави ҳамкориро тарҳрезӣ карда, онҳоро дар муҳлатҳои муайяншуда барои баррасӣ пешниҳод менамояд.
Зимни мулоқот таъкид шуд, ки самтҳои афзалиятдори ҳамкории иқтисодии ду мамлакат саноати истихроҷи маъдан, металлургияи ранга, бахши мошинсозӣ, комплекси агросаноатӣ, энергетика, саноати сабук, нақлиёт ва коммуникатсия ба ҳисоб мераванд.
Ҳамчунин, ҷонибҳо оид ба дурнамои ҳамкории вилояти Хатлон ва Қазоқистон табодули андеша карда, барои зиёд намудани ҳаҷми воридоти маҳсулоти нафтӣ ва гандум аз Қазоқистон ва содироти пахта, маҳсулоти сабзавотию меваҳои Тоҷикистон ба ин кишвар изҳори ҳавасмандӣ намуданд.
Боиси тазаккур аст, ки соли 2019 содироту воридоти молу маҳсулот миёни вилояти Хатлон ва Қазоқистон 4,3 миллион доллари ИМА-ро ташкил дод. Дар ҳашт моҳи соли равон ин рақам ба беш аз 5,7 миллион доллар расид.
Кароматулло АТО,
«Ҷумҳурият»
Баёни ақида (0) Санаи нашр: 18.09.2020 №: 179 Мутолиа карданд: 911
