сиёсат
БАРНОМАИ ПЕШАЗИНТИХОБОТИИ НОМЗАД БА МАНСАБИ ПРЕЗИДЕНТИ ҶУМҲУРИИ ТОҶИКИСТОН ЛАТИФЗОДА РУСТАМ БАРОТ, КИ АЗ ҶОНИБИ ҲИЗБИ АГРАРИИ ТОҶИКИСТОН ПЕШНИҲОД ШУДААСТ
Ҳамчун номзад ба мансаби Президенти Ҷумҳурии Тоҷикистон:
-бо дарки масъулият ва нангу номуси ватандорӣ;
-барои таъмини рушди устувори иқтисодӣ;
-боло бурдани сатҳи иҷтимоии зиндагии мардуми кишвар
бо шиори «Зиндагии арзанда ба ҳар як шаҳрванди Тоҷикистон» ҳадафҳои асосии барномавии зеринро ба баррасии шумо пешкаш менамоям:
1. ДАР БАХШИ АМНИЯТИ МИЛЛӢ:
- Тарғиби ғояҳои ватандӯстӣ, тақвияти зиракии сиёсӣ;
- таҳкими иқтидорҳои мудофиавӣ тавассути хариди техника ва воситаҳои муосири ҳарбӣ, тавсеаи ҳамкориҳо дар чаҳорчӯби Созмони Аҳдномаи амнияти дастаҷамъӣ, Иттиҳоди Давлатҳои Мустақил ва Созмони ҳамкории Шанхай;
- баланд бардоштани обрӯ ва эътибори хизмат дар сафи Қувваҳои Мусаллаҳ ва мақомоти корҳои дохилӣ;
- ба роҳ мондани хизмат дар сафи Қувваҳои Мусаллаҳ дар асоси шартнома (алтернативӣ), дастгирии оилаҳои хизматчиёни ҳарбӣ;
- беҳтар кардани шароити иқтисодӣ ва иҷтимоии маҳалҳои аҳолинишини наздисарҳадӣ.
2. ДАР БАХШИ ИҚТИСОД:
- Ҳамроҳшавӣ ба Иттиҳоди гумрукӣ бо дар назаргирии ҳатмии манфиатҳои Тоҷикистон, пеш аз ҳама, халалдор насохтани истиқлолияти сиёсӣ ва иқтисодӣ;
- истифодаи бештари иқтидорҳои энергетикӣ тавассути бунёди неругоҳҳои хурду миёнаи барқи обӣ, ҷалби маблағҳои институтҳои байналмилалии молиявӣ ва сармоягузорони инфиродӣ;
- бунёди корхонаҳои нави саноатии хурду миёна вобаста ба захираҳои табиӣ ва кории маҳал, пурра ба кор андохтани корхонаҳои саноатии мавҷуда;
- кам кардани шумораи санҷишҳои корхонаҳои истеҳсолӣ ва хизматрасонӣ, ҷорӣ кардани шакли ягонаи иҷозат барои фаъолияти соҳибкорӣ;
- таъсиси марказҳои логистикӣ дар минтақаҳо, кластерҳои истеҳсоливу тиҷоратӣ бо мақсади тезондани суръати саноатисозии мамлакат;
- амалӣ намудани сиёсати рушди баробартавозуни минтақаҳои кишвар;
- баланд бардоштани имиҷи сайёҳии кишвар, бунёди инфрасохтори дахлдор ва ташкили хизматрасонии муносиби сатҳи ҷаҳонӣ, зиёд кардани хатсайрҳои сайёҳӣ;
- фароҳам овардани шароити мусоид барои қонунӣ кардани (легализатсияи) иқтисодиёти пинҳонӣ ва рақобати солим байни соҳибкорон;
- таъсиси институти Омбудсмен оид ба ҳимояи ҳуқуқи соҳибкорон;
- таҳия ва қабули Консепсия, Стратегия ва Барномаи миллии рушди иқтисодиёти минтақаҳои кӯҳӣ.
3. ДАР БАХШИ СИЁСАТИ ДАВЛАТИИ АГРАРӢ:
- Боз ҳам баланд бардоштани мавқеи бахши аграрӣ дар таъмини амнияти озуқавории мамлакат;
- вобаста ба таҷдиди соҳа ва талаботи имрӯза бозбинӣ кардан ва тақвият додани фаъолияти Вазорати кишоварзӣ ва Агентии беҳдошти замин ва обёрӣ;
- озод кардани соҳаи кишоварзӣ аз андоз, баланд бардоштани нафақаи кишоварзон то сатҳи нафақаи миёнаи ҷумҳуриявӣ;
- баланд бардоштани маърифати экологии аҳолӣ, ҳифз ва истифодаи оқилонаи захираҳои табиат;
- ташкили кластерҳои агросаноатӣ, хизматрасонӣ дар бахши бозорёбӣ, ташаккул ва дастгирии брендҳои маҳаллии маҳсулоти кишоварзӣ, дастгирии истеҳсолоти хоҷагиҳои ёрирасони аҳолӣ;
- тарғиб ва дастгирии муттаҳидшавии ихтиёрии хоҷагиҳои деҳқонӣ ба мақсади баланд бардоштани самаранокии фаъолият ва рақобатпазирии молу маҳсулоти онҳо;
- ҷорӣ кардани дастовардҳои илмии муассисаҳои илмию таҳқиқотӣ дар истеҳсолоти кишоварзӣ;
- беҳтар кардани хизматрасонии соҳаи кишоварзӣ, аз ҷумла таъминот бо тухмии хушсифат, чорвои зотии сермаҳсул, нуриҳои минералӣ, техникаю технологияҳои муосир;
- истифодаи васеи технологияи рақамӣ дар обёрии кишоварзӣ ва идоракунии замин;
- ҷорӣ кардани имтиёзҳои тарофавӣ барои пойгоҳҳои обкашӣ вобаста ба истифодаи неруи барқ;
- бунёди обанборҳои хурд ва миёна дар доманакӯҳҳо бо мақсади аз худ кардани заминҳои нав ва таъмини устувори оби полизӣ.
4. ДАР БАХШИ ИҶТИМОӢ:
- Бепул кардани хизматрасонии ҳиссаи асосии муассисаҳои тиббӣ, ба роҳ мондани суғуртаи тиббии ихтиёрӣ;
- татбиқи барномаҳои рушди иҷтимоию иқтисодии ноҳияҳо, ҷамоатҳои шаҳрак ва деҳот, ба роҳ мондани хизматрасонии муосири коммуналӣ дар деҳот;
- тақвият додани иқтидорҳои миллии муқовимат ба таҳдидҳои глобалӣ, аз ҷумла пандемияи COVID-19;
- ҳифзи ҳуқуқ ва манфиатҳои муҳоҷирони корӣ, бахусус дар Федератсияи Россия, баланд бардоштани маърифати ҳуқуқӣ ва касбии онҳо тавассути марказҳои махсуси машваратӣ, таълимӣ ва касбомӯзӣ;
- дастгирии ашхоси камбизоат, маъюбон ва дигар шаҳрвандони ниёзманди ёрии иҷтимоӣ.
5. ДАР БАХШИ ИЛМ ВА МАОРИФ:
- Маблағгузории махсуси давлатӣ (на камтар аз 5% - и Буҷети давлатӣ) барои ихтироъкорӣ ва таҳқиқоти инноватсионӣ дар самтҳои афзалиятноки иқтисодиёти воқеӣ, ҷорӣ кардани онҳо дар истеҳсолот;
- баланд бардоштани маоши омӯзгорони муассисаҳои таҳсилоти миёнаи умумӣ;
- 50% кам кардани маблағи шартномаи таҳсил дар муассисаҳои таҳсилоти олӣ барои оилаҳои ниёзманд, бепул кардани таҳсил барои донишҷӯёни болаёқат;
- тайёр кардани кадрҳо дар асоси омӯзиши талаботи соҳаҳои иқтисодиёт ба мутахассисон;
- беҳтар кардани таъминоти моддии муассисаҳои таҳсилоти ҳамаи сатҳҳо;
- рушди низоми тарбияи томактабӣ, маблағгузории давлатии будубоши кӯдакони оилаҳои ниёзманд дар муассисаҳои томактабӣ.
6. ДАСТГИРИИ ЗАН ВА ОИЛА:
- Ҳавасмандгардонии занони соҳибкор, пешбарии занон ба мансабҳои давлатӣ дар мақомоти иҷроия ва намояндагӣ;
- дастгирии иттиҳодияҳои ҷамъиятии занон, ҳифзи ҳуқуқу манфиатҳои онҳо;
- дастгирии давлатии оила, хусусан оилаҳои ниёзманд, фароҳам овардани муҳити солим ва шароити мусоид барои таҳкими оила, баланд бардоштани маърифати оиладории ҷавонон.
7. ДАР БАХШИ МАЪНАВИЁТ:
- Тарғиби анъана ва расму оинҳои суннатӣ, ҳурмату эҳтироми якдигар, зиндагии дӯстонаи ҳамаи миллату халқиятҳои кишвар;
- баланд бардоштани мақоми илм, маориф ва фарҳанг дар ташаккули шуури ватандӯстӣ, заковати фитрӣ ва худшиносии миллӣ;
- пос доштан ва ҳифз кардани мероси таърихию фарҳангӣ, арзишҳои ахлоқӣ ва маънавӣ;
- таблиғи фарҳанги миллии аҷдодӣ, тарғиби бунёдкориву созандагии даврони истиқлол.
8. ДАР БАХШИ ДАСТГИРИИ ҶАВОНОН:
- Тарбияи ҷавонон дар рӯҳияи ватандӯстию ватанпарастӣ;
- дастгирии ташаббускорӣ ва таҳқиқоти илмии ҷавонон, татбиқи дастовардҳои инноватсионии онҳо дар истеҳсолот;
- ба ҷойи кор ва шароити зист таъмин кардани мутахассисони ҷавон;
- дастгирии давлатии таълим, бозомӯзӣ ва таҷрибаомӯзии ҷавонон ва мутахассисони болаёқат дар муассисаҳои бонуфузи хориҷи кишвар;
- беҳтар кардани шароити истироҳат, варзиш ва фароғати ҷавонон.
Баёни ақида (0) Санаи нашр: 23.09.2020 №: 182 - 183 Мутолиа карданд: 745
