сиёсат
СУҲБАТҲОИ ТЕЛЕФОНӢ
7 октябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Федератсияи Россия муҳтарам Владимир Путин суҳбати телефонӣ анҷом доданд.
Роҳбари давлати мо, бо ибрози беҳтарин ва самимитарин таманниёт, Президенти Россияро ба муносибати зодрӯзаш сидқан табрик намуданд. Сарони ду давлат муколамаро оид ба роҳҳои рушди муносибатҳои стратегии Тоҷикистону Россия идома доданд.
Дар ҷараёни суҳбат, ҳамчунин, атрофи масъалаҳои муҳими байналмилалӣ ва минтақавӣ мубодилаи афкор сурат гирифта, ба ташаннуҷи ташвишовари вазъ дар Қирғизистон таваҷҷуҳи махсус зоҳир шуд.
7 октябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ намуданд.
Дар рафти суҳбат Пешвои миллат ва Президенти Ӯзбекистони дӯст муколамаашонро ҷиҳати баррасии масъалаҳои рӯзмарраи байналмилалӣ ва минтақавӣ идома доданд.
Дар ин замина, ба рӯйдодҳои рӯзҳои охир дар Қирғизистон таваҷҷуҳи хосса зоҳир шуд. Дар робита ба ин, ҷонибҳо аҳамияти бо роҳи музокирот ҳар чи зудтар ҳаллу фасл намудани вазъияти буҳронии дар ин кишвари ҳамсоя баамаломадаро таъкид карданд.
7 октябр байни Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қазоқистон муҳтарам Қосим-Жомарт Токаев суҳбати телефонӣ сурат гирифт.
Дар рафти суҳбат сарони ду давлат муколамаи худро атрофи масъалаҳои мубрами байналмилалӣ ва минтақавӣ идома бахшиданд.
Зимнан, ҷонибҳо ҳодисаҳоеро, ки имрӯзҳо дар Қирғизистон сурат мегиранд, мавриди баррасӣ қарор дода, ҷиҳати бо роҳи музокирот ҳар чи зудтар дарёфт намудани роҳҳои ҳаллу фасли вазъияти буҳронии дар ин кишвари ҳамсоя баамаломада, ибрози ақида карданд.
Баёни ақида (0) Санаи нашр: 08.10.2020 №: 198 Мутолиа карданд: 716
