сиёсат
СУҲБАТИ ТЕЛЕФОНИИ ЭМОМАЛӢ РАҲМОН БО ШАЙХ ТАМИМ БИН ҲАМАД ОЛИ СОНӢ
18 ноябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Амири Давлати Қатар Шайх Тамим бин Ҳамад оли Сонӣ суҳбати телефонӣ анҷом доданд.
Дар ибтидои суҳбат Амири Давлати Қатар бори дигар табрикоти самимӣ ва таманниёти неки хешро ба Пешвои миллат дар робита ба натиҷаҳои интихоботи президентии дар Тоҷикистон баргузоршуда ва аз нав интихоб гардиданашон ба маснади олии Президенти Ҷумҳурии Тоҷикистон иброз доштанд.
Дар рафти суҳбат сарварони ду кишвари дӯст вазъи имрӯза ва дурнамои ҳамкориҳои Тоҷикистону Қатарро баррасӣ намуданд.
Зикр гардид, ки Тоҷикистон ба ҳамкориҳои ҷонибҳо, ки бар асоси манфиатҳои муштарак қарор доранд, баҳои баланд медиҳад.
Ҳамчунин, ҷонибҳо таъкид карданд, ки ҳамкориҳои Тоҷикистону Қатар, аз ҷумла дар бахшҳои гуногуни иқтисод бо шумули соҳаҳои савдо, сармоягузорӣ, саноат, энергетика, кишоварзӣ ва сайёҳӣ, ҳанӯз ҳам дорои захираҳои истифоданашуда мебошанд.
Дар маркази таваҷҷуҳи тарафайн, инчунин, ҳолат ва ояндаи робитаҳои ду кишвар дар чорчӯбаи сохторҳои ҳамкориҳои бисёрҷониба ва масъалаҳои умдаи байналмилаливу минтақавӣ қарор доштанд.
Дар ин замина ҷонибҳо оид ба таъсири пайомадҳои глобалии пандемияи COVID - 19, ки ҷомеаи ҷаҳониро нигарон кардааст, ибрози андеша карданд.
Зикр гардид, ки Тоҷикистон низ дар вазъияти мавҷуда истисно нест ва тамоми саъю талоши худро ба пешгирии оқибатҳои он, аз ҷумла дар ҳамкорӣ бо ҷомеаи ҷаҳонӣ, равона менамояд.
Дар зимн, Президенти Ҷумҳурии Тоҷикистон ба Давлати Қатар ҷиҳати ҳамкорӣ дар мубориза бо ин бемории сироятӣ изҳори сипос намуданд.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз Амири Давлати Қатар Шайх Тамим бин Ҳамад оли Сонӣ ҷиҳати анҷом додани сафари давлатӣ ба Тоҷикистон даъват ба амал оварданд. Даъвати мазкур аз ҷониби Қатар бо камоли майл пазируфта шуд.
Суҳбат дар фазои самимият, дӯстӣ ва ҳамдигарфаҳмӣ сурат гирифт.
Баёни ақида (0) Санаи нашр: 19.11.2020 №: 223 Мутолиа карданд: 743
