иқтисод
ХАТЛОН. НАҚШАИ ИСТЕҲСОЛИ ПАХТА 95,64 ДАРСАД ИҶРО ГАРДИД
Дар мақомоти иҷроияи ҳокимияти давлатии вилояти Хатлон бо иштироки раиси вилоят Қурбон Ҳакимзода ҷаласаи назоратӣ баргузор гардид. Зимни ҷаласа раванди иҷрои нақшаи ҷамъоварии ҳосили пахта дар шаҳру навоҳии пахтакори вилоят мавриди баррасӣ қарор гирифт.
Нахуст, муовини якуми раиси вилоят Амонулло Салимзода оид ба рафти иҷрои нақша ва масоили қафомонии баъзе деҳот дар ҷамъоварии ҳосили пахта гузориш дод.
Зикр шуд, ки пахтакорони вилоят то 18 ноябри соли ҷорӣ 95,64 дарсади нақшаи ғунучини пахтаро иҷро намуда, ба хирмани мамлакат 266 076 тонна «тиллои сафед» супурданд.
Боиси тазаккур аст, ки соли равон дар вилоят дар майдони 124 ҳазору 175 гектар чигит кишт шуда, нақшаи ҷамъоварии пахта 278 ҳазору 200 тоннаро ташкил медиҳад.
Қурбон Ҳакимзода ба масъулони сарраёсати кишоварзӣ, намояндагони мақомоти иҷроияи ҳокимияти давлатии вилоят дар шаҳру ноҳияҳои пахтакор ва идораҳои кишоварзии шаҳру навоҳӣ дастур дод, ки барои беталаф ҷамъ овардани ҳосили боқимонда тадбирҳои зарурӣ андешанд.
Носирҷон Маъмурзода, мудири шуъбаи иттилоотию таҳлилии дастгоҳи раиси вилоят, ба хабарнигори «Ҷумҳурият», гуфт, ки бо мақсади сари вақт ва беталаф ҷамъ овардани ҳосили пахта қарори дахлдори раиси вилоят аз 7 сентябри соли равон «Дар бораи тадбирҳои сари вақт ва беталаф ҷамъоварӣ намудани ҳосили пахтаи соли 2020» ба тавсиб расидааст, ки дар асоси он байни шаҳру ноҳияҳои пахтакор мусобиқаи меҳнатӣ ба роҳ монда шуда, ғолибон бо мукофотпулӣ ва сипосномаи раиси вилоят сарфароз гардонда мешаванд.
Кароматулло АТО,
«Ҷумҳурият»
Баёни ақида (0) Санаи нашр: 23.11.2020 №: 225 Мутолиа карданд: 728
