Амри Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бораи гузарондани Озмуни ҷумҳуриявии «Фурӯғи субҳи донои китоб аст» 9 феврали соли 2019 ба имзо расид. Озмун бо мақсади баланд бардоштани завқи китобхонӣ, тақвияти ҳофизаи фарҳангӣ, дарёфти чеҳраҳои нави суханвару сухандон, бой гардондани захираи луғавӣ, тақвияти ҷаҳони маънавӣ, инкишофи қобилияти эҷодӣ, фаъолгардонии доираи забондонӣ, ҳамчунин, арҷ гузоштан ба арзишҳои милливу фарҳангӣ ва таҳкими худогоҳию худшиносӣ миёни қишрҳои мухталифи ҷомеа тарҳрезӣ шудааст.

Даври ҷамъбастии озмун дар Китобхонаи миллии Тоҷикистон сурат гирифт. Вазорати маориф ва илми ҷумҳурӣ дар якҷоягӣ бо Кумитаи телевизион ва радиои назди Ҳукумати кишвар ва Китобхонаи миллии Тоҷикистон иштирокдорони озмунро аз ноҳияҳои дурдаст бо ҷойи хоб, хӯроки гарм ва нақлиёти хизматрасон таъмин намуданд. Дар рафти озмун ба ҳайати доварон ва ширкатдорони озмун обҳои ташнагишикан, чой, қаҳва ва шириниҳо пешниҳод низ мегардид. Меҳмонон аз Китобхона ва Осорхонаи миллии Тоҷикистон, боғҳои фарҳангиву фароғатии пойтахт дидан намуданд.
 Бояд ёдовар шуд, ки дар он 267 довталаб аз рӯи 5 номинатсияи озмун иштирок варзиданд, ки аз ин шумора аз ВМКБ 9, вилояти Суғд 59, вилояти Хатлон 79, ноҳияҳои тобеи марказ 62 ва аз шаҳри Душанбе 58 нафарро ташкил дод.  Аз рӯи мушоҳидаву баҳои ҳакамон довталабон ба озмун хуб тайёрӣ дидаанд. Ин аз рафти суханронии онҳо маълум мегардид.
Озмун нисбат ба сабқати гузашта фарқи куллӣ дошт. Хароҷоти марбут ба ташкил ва баргузории даври ҷамъбастии озмуни «Фурӯғи субҳи доноӣ китоб аст» имсол 1646 400 (як миллиону шашсаду чилу шаш ҳазору чорсад) сомониро ташкил медиҳад. Ин дар ҳолест, ки соли гузашта ин маблағ 310 000 сомониро ташкил медод.  Дар озмуни соли гузашта 4 номинатсия буд, аммо имсол як номинатсияи дигар бо номи «Шоирӣ» зам гардид. Ҳамчунин, номгӯи ҳар номинатсия вобаста ба синну соли иштирокчиён ҷудо шудааст.
Тибқи маълумоти оморӣ аксарияти ширкаткунандагонро хонандагони муассисаҳои таҳсилоти миёнаи умумӣ ва донишҷӯёни донишгоҳҳову донишкадаҳо ташкил медиҳанд. Чунин ҷараён гирифтани озмун моро муваззаф месозад, ки барои расидан ба ҳадафу моҳияти ин иқдомот роҳу усулҳои навро ҷустуҷӯ намуда, боз ҳам шавқу завқи намояндагони қишрҳои мухталифи ҷомеаро ба китобу китобхонӣ  бештар ҷалб созем. 

Сайдакбар АБДУАЗИЗ,
сармутахассиси шуъбаи дастхатҳои Шарқ ва
китобҳои нодири Китобхонаи миллии Тоҷикистон