барқияҳо
БАРҚИЯИ ТАБРИКӢ
15 декабр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Президенти тозаинтихоби Иёлоти Муттаҳидаи Амрико муҳтарам Ҷо Байден барқияи табрикӣ ирсол намуданд, ки дар он омадааст:
«Ҷаноби Олӣ!
Сарфарозам Шуморо ба муносибати интихоб гардиданатон ба симати Президенти Иёлоти Муттаҳидаи Амрико сидқан табрику таҳният гӯям.
Тоҷикистон таҳкиму тавсеаи муносибатҳои гуногунҷанбаи шарикӣ бо Иёлоти Муттаҳидаи Амрикоро аз самтҳои муҳимтарини сиёсати хориҷии худ медонад ва сатҳи имрӯзаву муҳтавои амалии онҳоро баланд арзёбӣ менамояд.
Бо истифода аз фурсати муносиб изҳори умед менамоям, ки дар давраи фаъолияти Шумо дар маснади олии Роҳбари Иёлоти Муттаҳидаи Амрико мо ҳамкориҳои судманди байни кишварҳоямонро дар арсаҳои гуногуни мавриди таваҷҷуҳи тарафайн рушди боз ҳам бештар хоҳем дод.
Омодагии ҷониби Тоҷикистонро ҷиҳати саъю талошҳои муштарак дар ин ҷода ва идомаи муколамаи созанда байни давлатҳоямон дар ҳамаи сатҳҳо иброз менамоям.
Бо камоли самимият ба Шумо сиҳатии бардавому саодатмандӣ ва дар фаъолияти сермасъули минбаъдаатон комёбиҳо, ба мардуми дӯсти кишвари Шумо сулҳу субот ва пешрафту шукуфоии беш аз пеш таманно дорам».
Баёни ақида (0) Санаи нашр: 16.12.2020 №: 240 Мутолиа карданд: 4779
