номаҳо
ГУФТАНД: «ХУБ ШУДААСТ», АММО...
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 20 августи соли 2019 ба ноҳияи Кӯҳистони Мастчоҳ ташриф оварда буданд. Зимни сафари муборак ва қудуми хуҷастаашон Ҷаноби Олӣ аз рафти ободкориҳои маркази маъмурии ноҳия - шаҳраки Меҳрон дидан намуда, бо аҳли зиё ва фаъолон мулоқоти судманд анҷом доданд.
Дар ҷараёни суҳбат, бо иноят ва лутфи Худованди меҳрубон ба мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мушарраф гаштам. Аз ин хеле шукргузорам. Дар зиндагӣ хотираҳои рангин бисёр дорам, вале мулоқот бо Пешвои шоистаи миллат бароям рӯйдоди муҳими таърихӣ гардид. Ҷаноби Олӣ маро ба назди худ даъват намуданд, мо бо ҳам даст фишурдем, байнамон суҳбати озод ва гарму ҷӯшон сурат гирифт. Баъд аз огаҳӣ пайдо кардан аз маош ва таҷрибаи кориам, муҳтарам Пешвои миллат аз ман пурсиданд: «Оиладор ҳастӣ?!» «Не, муҳтарам Ҷаноби Олӣ», - гуфтам.
Пешвои миллат ба гулдухтарони зебо муроҷиат карданд: «Ана ҳамин ҷавони қадрас, мактаби олиро бо дипломи аъло хатм намудааст, муҷаррад! Ҳатто бисёр сухандон. Агар ягон хоҳишманд бошад, барои бунёди оилаи солим, марҳамат». Дар он ҳангом вуҷуди маро чӣ гуна эҳсоси шодмонӣ фаро гирифта буд, Худо медонаду худам. Шукру сипоси бепоён!...
Дар рафти мулоқот Сарвари давлат барои дастгирии ман ҳамчун омӯзгори ҷавон ба раиси ноҳия Муҳаммадҷобир Раҷабзода ва ба раиси вилоят Раҷаббой Аҳмадзода гуфтанд:
Оиладор кардани омӯзгори ҷавон Ниёзӣ Кишваршоҳ;
Ба тариқи ҳашар пӯшондани хонаи истиқоматии ӯ;
Таъмин намудан бо даҳ қуттӣ занбӯри асал ва як гов бо гӯсолааш вазифаи шумо.
Аз сафари кории Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ба ноҳияи Кӯҳистони Мастчоҳ қариб 2 сол сипарӣ шуд, вале ҳанӯз ҳам ин супориши Президенти Ҷумҳурии Тоҷикистон дар сатҳи ноҳия ва вилоят иҷро нагардидааст. Муҳаммадҷобир Раҷабзода ва Раҷаббой Аҳмадзода даст бар қафаси сина гузошта: «Хуб шудааст, муҳтарам Ҷаноби Олӣ, хуб шудааст, ба ҷону дил иҷро мекунем», - гуфта буданд, вале сад афсӯс…
Муҳаммадҷобир Раҷабзода аз вазифа рафт. Мо 6 маротиб ба раиси вилоят Раҷаббой Аҳмадзода хаттӣ муроҷиат кардем. Билохир, соҳиби гову гӯсола, қитъаи замини наздиҳавлигӣ, шаҳодатномаи ҳуқуқи истифодабарии он шудам. 8 мошин хок, 196 метр арматура ва 40 халта семент дастрас карданд, шукр, вале бо ин миқдор маҳсулоти сохтмонӣ чӣ хел хона созам?
Кишваршоҳ НИЁЗӢ,
сокини деҳаи Эсизи Поён, хонаи рақами 50,
деҳоти «Иван-тоҷик», ноҳияи Кӯҳистони Мастчоҳ
Баёни ақида (0) Санаи нашр: 30.12.2020 №: 250 - 251 Мутолиа карданд: 8619
