сиёсат
СУҲБАТҲОИ ТЕЛЕФОНИИ ПЕШВОИ МИЛЛАТ
30 декабр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ доир намуданд.
Дар ҷараёни суҳбат роҳбарони ду давлат дар фазои дӯстӣ ҳамдигарро бо Соли нав самимона табрик намуда, зимни таманниёти неки хеш ба мардумони тоҷику ӯзбек бурдборӣ ва сулҳу шукуфоӣ орзу карданд.
Пешвои миллат, Президенти Ҷумҳурии Тоҷикистон зикр намуданд, ки сарфи назар аз мушкилоти воқеии соли равон, ҷонибҳо тавонистанд аксари тавофуқоти қаблан бадастомадаро амалӣ гардонанд.
Ба ин раванд аз бисёр ҷиҳат ҷаласаи навбатии Комиссияи байниҳукуматии Тоҷикистону Ӯзбекистон оид ба ҳамкории тиҷоративу иқтисодӣ мусоидат намуд. Аз ҷумла, таъкид шуд, ки коргоҳи муштараки Тоҷикистону Ӯзбекистон «Артел Авесто Электроникс», ҳамчунин, муассисаи таҳсилоти миёнаи умумӣ, ки аз ҷониби бародарони ӯзбек дар ноҳияи Спитамени Тоҷикистон сохта шудааст, расман мавриди истифода қарор гирифтанд.
Сарвари давлат ҳамкории зичи тарафҳоро дар шароити паҳншавии пандемияи COVID -19 махсусан таъкид намуда, дар ин робита ба иқдомҳои башардӯстонаи Ӯзбекистон нисбат ба кишвари мо ҳамчун шакли олии ифодаи анъанаҳои неки ҳамсоягӣ ва дастгирии ҳамдигар, ки таърихан хоси муносибатҳои ду халқ мебошанд, баҳои баланд доданд.
Дар охир ҷонибҳо ҳавасмандии худро дар бобати таҳким бахшидани ҳамаи самтҳои ҳамкориҳои дарозмуддату бисёрҷонибаи Тоҷикистону Ӯзбекистон дар доираи шарикии стратегӣ иброз намуданд.
30 декабр миёни Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Беларус муҳтарам Александр Лукашенко суҳбати телефонӣ анҷом дода шуд.
Президентҳои ду кишвар ҳамдигарро ба муносибати фаро расидани Соли нав самимона табрик намуданд. Аз ҷумла, Пешвои миллат, Президенти Ҷумҳурии Тоҷикистон ба мардуми Беларус осмони соф, субот ва рушди устувор таманно карданд.
Дар рафти суҳбат Сарвари давлати мо зикр намуданд, ки ба шарофати саъю талошҳои ҷонибҳо муносибатҳои ду кишвар тайи солҳои охир ба сатҳи сифатан нав бароварда шуданд.
Дар фарҷом изҳори бовар карда шуд, ки ҷонибҳо ҳамкориҳои судмандро дар чорчӯбаи шарикии босамари стратегӣ минбаъд низ афзоиш хоҳанд дод.
30 декабр байни Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қазоқистон муҳтарам Қосим-Жомарт Токаев суҳбати телефонӣ доир гардид.
Дар оғози суҳбат ҷонибҳо ба муносибати фарорасии Соли нави 2021 мубодилаи табрикоти гарм намуда, ба мардумони Тоҷикистону Қазоқистон некуаҳволӣ ва сулҳу шукуфоӣ орзу карданд.
Дар рафти суҳбат ҷонибҳо омодагии худ-ро ҷиҳати идомаи муколамаи эътимодбахши байнидавлатӣ оид ба тамоми мавзӯъҳои ҳамкориҳои дуҷонибаву бисёрҷонибаи Тоҷикистону Қазоқистон таъкид карданд.
Махсусан зикр гардид, ки алорағми ҳамаи мушкилоте, ки соли ҷорӣ бар асари пандемияи COVID -19 сар задаанд, ҷонибҳо тавонистанд рушди мусбати шарикии стратегии Тоҷикистону Қазоқистонро нигоҳ доранд.
Ҳамин аст, ки имрӯз ҳам Қазоқистон ҳамчун яке аз шарикони асосии тиҷоративу иқтисодии Тоҷикистон боқӣ мемонад.
Дар фарҷоми суҳбат ҷонибҳо изҳори бовар намуданд, ки бо саъю талоши муштарак ҳамкориҳои судманди байни ду кишвар минбаъд ҳам дар ҳамаи арсаҳо идома хоҳанд ёфт.
30 декабр суҳбати телефонии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти якуми Ҷумҳурии Қазоқистон муҳтарам Нурсултон Назарбоев сурат гирифт.
Пешвои миллат, Президенти Ҷумҳурии Тоҷикистон Президенти якуми Ҷумҳурии Қазоқистон ва дар шахсияти ӯ мардуми бародари Қазоқистонро ба муносибати фарорасии Соли нав самимона табрик карда, барои ҷомеаи Қазоқистон сулҳу субот ва шукуфоии минбаъдаро орзу намуданд.
Сарвари давлати мо, ҳамчунин, сипоси худро ба Нурсултон Назарбоев барои табрикоти гарму таманниёти нек ба унвони мардуми Тоҷикистон иброз доштанд.
Дар рафти суҳбат Президенти Ҷумҳурии Тоҷикистон густариши бомуваффақияти муносибатҳои зичи дӯстиву ҳамкориҳои ҳамаҷонибаи байни Тоҷикистону Қазоқистонро, сарфи назар аз оқибатҳои манфии пандемия, зикр карданд.
Инчунин, Сарвари давлати мо тазаккур доданд, ки имрӯзҳо Ҷумҳурии Қазоқистон ба рӯйдоди муҳими сиёсӣ – интихоботи парламентӣ омодагӣ мегирад. Дар ин иртибот ӯ ба сокинони Қазоқистон баргузории бомуваффақияти чорабинии мазкурро, ки омили боз ҳам бештар таҳким ёфтани субот, ризоият ва ваҳдати миллӣ дар ҷомеа арзёбӣ мегардад, таманно карданд.
Ҷонибҳо изҳори итминон намуданд, ки бо талошҳои муштарак шарикии стратегии Тоҷикистону Қазоқистон минбаъд низ ба нафъи мардумони ду кишвар тавсеа хоҳад ёфт.
Баёни ақида (0) Санаи нашр: 31.12.2020 №: 252 Мутолиа карданд: 624
