иқтисод
ХУҶАНД. ВУСЪАТИ БУНЁДКОРИҲО БА ИСТИҚБОЛИ ҶАШНИ МИЛЛӢ
Ҳоло дар шаҳри Хуҷанд омодагӣ ба Ҷашни 30 - солагии Истиқлолияти давлатии Ҷумҳурии Тоҷикистон бомаром идома дошта, тибқи нақшаи чорабиниҳо то ин рӯзи таърихӣ мавриди истифода қарор додани 510 иншооти таъйиноти гуногун, аз ҷумла муассисаҳои таълимию бунгоҳҳои тиббӣ, коргоҳҳои истеҳсолию коркарди саноатӣ, биноҳои маъмурию хизматӣ ва истиқоматии баландошёна, марказҳои фароғатию истироҳатӣ, хизматрасонӣ, майдончаҳои варзиш ва иншооти ҷашнии дигар дар назар аст. То 1 январи соли равон 473 иншооти ҷашнӣ бунёд ёфта, беш аз 1000 нафар бо ҷойи кори доимӣ ва маоши хуб таъмин шуд.
Маъмури Юсуфзод, котиби матбуотии дастгоҳи раиси шаҳр, зимни суҳбати телефонӣ ба хабарнигори рӯзномаи «Ҷумҳурият» гуфт, ки айни замон дар маҳаллаи Темурмалики шаҳр сохтмони бинои нави маркази стандартизатсия, метрология, сертификатсия ва назорати савдои вилоят бомаром ҷараён дорад. Лоиҳаи иншоот аз тарафи ҶДММ «Суғдшаҳрофар» тартиб дода шуда, сохтмони онро ҶДММ «Авитсенна» ба уҳда дорад. Иншоот аз таҳхона ва панҷ ошёна иборат буда, соли равон дар рӯзи таҷлили Наврӯзи байналмилалӣ мавриди баҳрабардорӣ қарор мегирад. Маблағи умумии лоиҳаи сохтмон 8 миллиону 500 ҳазор сомониро ташкил медиҳад.
Дар таҳхона ҳафт дафтари корӣ ҷойгир буда, барои шуъбаи таъминоти метрологӣ пешбинӣ шудааст. Дар ошёнаи якум маҷлисгоҳ барои 150 кас ва ошхона бо 50 ҷой пешбинӣ гардидааст. Дар ошёнаҳои дуюм ва панҷум дафтарҳои корӣ бунёд меёбанд.
Ҳуҷраҳои ёрирасон, ки дар атрофи бинои асосӣ ҷойгиранд мартуб ба дафтари қабули намунаҳо, таваққуфгоҳи автомобилӣ, анбор, дафтарҳои корӣ барои ташхиси маҳсулотҳои нафтӣ, зеристгоҳи барқӣ ва дегхона мебошанд.
Чуноне иттилоъ дода шуд, чанде пеш раиси вилоят Раҷаббой Аҳмадзода ва иҷрокунандаи вазифаи раиси шаҳр Фирдавс Шарифзода бо раванди корҳои бунёдкорӣ дар ин иншоот шинос шуданд. Раиси вилоят ба бинокорон ҷиҳати суръатбахшӣ ва босифат анҷом додани корҳо ва ободонии атрофи он дастуру супоришҳои мушаххас дод.
Кароматулло АТО,
«Ҷумҳурият»
Баёни ақида (0) Санаи нашр: 11.01.2021 №: 6 Мутолиа карданд: 752
