Бахтиёр Назарзода, сардори сарраёсат, зикр кард, ки соли сипаришуда бо руйдодҳои муҳиму хотирмони худ соли воқеан таърихӣ барои молиячиёни вилоят боқӣ мемонад.

Гуфта шуд, ки дар вилоят соли 2020 ҳаҷми гардиши мол дар соҳаи савдо 6,1 миллиард сомониро ташкил дод, ки нисбат ба соли гузашта афзоиш ва хизматрасониҳои пулакӣ дар ҳамаи соҳаҳои хизматрасонӣ ба 1,8 миллиард сомонӣ баробар шуд, ки нисбат ба соли 2019-ум 1,7 дарсад коҳиш ёфтааст. Гардиши савдои хориҷии вилоят 276,4 миллион доллари ИМА, аз ҷумла воридот 147,5 миллион ва содирот ба 128 миллион доллар, баробар гардид.

Ҳаҷми истеҳсоли маҳсулоти кишоварзӣ соли гузашта  ба 15,7 миллиард сомонӣ баробар гардид, ки нисбат ба соли 2019-ум 1,3 миллиард сомонӣ зиёд ва суръати афзоиш 8,8 дарсадро ташкил дод. Дар давраи ҳисоботӣ музди миёнаи моҳона ба 1028 сомонӣ баробар гардидааст, ки нисбат ба соли 2019 зиёд мебошад.

Нақшаи даромади буҷети маҳаллӣ соли гузашта аз рӯи контингенти умумӣ бо назардошти андози иҷтимоии ғайрибуҷетӣ 102 дарсад ва аз ҳисоби даромадҳои худӣ 103 дарсад таъмин гардида, ба буҷет ба ҷои 1218, 5 миллион сомонӣ 1254,8 миллион сомонӣ ворид шуд, ки нисбат ба нақша 36,4 миллион сомонӣ бештар аст.

Бақияпулии андозҳоро шаҳру но-ҳияҳои Бохтар - 4 миллион, Вахш - 4,8 миллион, Хуросон - 3,1 миллион, Абдураҳмони Ҷомӣ - 2,4 миллион, Ҷайҳун - 2,3 миллион, Восеъ - 5,8 миллион, Шаҳритус - 4 миллион, ноҳияи Фархор - 364 ҳазор сомонӣ бақияпулиҳоро нисбат ба аввали сол зиёд намудаанд.

Дар доираи ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилояти Хатлон бо мақсади дастгирию ёрӣ ба кормандони соҳаи тандурустӣ, тақвияти тадбирҳои пешгирӣ ва паҳншавӣ аз бемории коронавирус, муолиҷаи саривақтии беморон ва ёрӣ ба оилаҳои ниёзманд аз ҳисоби маблағҳои харҷномавӣ, махсус бақияи озоду даромади шаҳру ноҳияҳо 14,1 миллион сомонӣ ҷудо гардид. Инчунин, бо ин мақсад, аз ҳисоби буҷети ҷумҳуриявӣ 7,7 миллион сомонӣ ҷудо гашт, ки ба шаҳру ноҳияҳои вилоят равона шуд.

Хайрулло Юсуф дар суханронии худ кормандони раёсати молияи шаҳру ноҳияҳои вилоятро таъкид кард, ки баҳри иҷрои буҷети маҳаллӣ, дарёфти манбаъҳои иловагии андозҳо чораҳои иловагӣ андешанд, ба мақсаднок ва самаранок истифода бурдани маблағҳои буҷетӣ аҳамияти ҷиддӣ диҳанд ва дар навбати  аввал, маблағҳои воридгардидаро барои пардохти саривақтии музди меҳнат, фонди нафақа ва ҷубронпулӣ равона созанд.

Дар охир зикр шуд, ки дар асоси дастуру ҳидоятҳои Пешвои маҳбуби миллат муҳтарам Эмомалӣ Раҳмон ҷиҳати сазовор истиқбол гирифтани Ҷашни 30 - солагии Истиқлолияти давлатӣ тадбирҳои зарурӣ андешида, онро бо дастовардҳои арзандаи меҳнатӣ пешвоз гирем.