Дар МТМУ № 7 - и деҳаи Басмандаи ноҳияи Деваштич ифтитоҳи осорхонаи мактабии Аълочии маориф ва илми Ҷумҳурии Тоҷикистон, дорандаи Ифтихорномаи Ҳукумати Ҷумҳурии Тоҷикистон Рустамҷон Ҳасанов ва рӯнамоии китоби «Машъалафрӯзи маърифат» баргузор гардид.
Ашӯралӣ Ҷалилзода, иҷрокунандаи вазифаи раиси ноҳия, аз лавҳи ёдгорӣ парда бардошта, аз осорхонаи нав дидан кард. Ҳамзамон, кабинетҳои фаннии ҷуғрофия ва технологияи компютериро пас аз таъмиру таҷдид ва таҷҳизондан ба истифода дод.
- Дар партави сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фарзандону пайвандони хонаводаи Ҳасановҳо кӯшидаанд, то як гӯшаи диёр обод шуда, хонандагон аз шароити беҳтари таълиму тарбия баҳравар бошанд. Ёдовар мешавем, ки бо қарори маҷлиси вакилони халқи вилояти Суғд аз 21 октябри соли 2020, таҳти рақами № 85, МТМУ № 7 ба номи Рустамҷон Ҳасанов гузошта шуд. Бовар дорем, ки фарзандону шогирдони садоқатманди устод дар оянда барои ободу зебо ва ғанигардонии пояҳои моддиву техникии ин муассисаи таълимӣ талош меварзанд, - гуфт Ашӯралӣ Ҷалилзода.
МТМУ № 7 яке аз муассисаҳои калонтарини ноҳия буда, соли 1946 таъсис ёфтааст. Дар муассиса 1096 хонанда ба таҳсил фаро гирифта шудаанд.
Фарзандон ва додари соҳибкори  Рустамҷон Ҳасанов – Абдусамад Ҳоҷиев ба муассисаи таълимии мазкур 13 компютер бо маҷмӯи мизу курсиҳои компютерӣ, 3 телевизиор ва асбоби аёнии таълим туҳфа карда, ҳамчунин, ҳуҷраи директор, як синфхона, осорхона ва кӯчаи назди муассисаро таъмир намуданд. Маблағи умумии корҳои анҷомёфта навад ҳазор сомониро ташкил медиҳад.
Осорхонаро бо китобҳои сиёсиву бадеӣ, мизу курсӣ ва экрани махсус таъмин ва омӯзгори муассисаи таълимии мазкур Ҷамолиддин Бобоевро масъули ин боргоҳи маънавӣ таъйин кардаанд.
Дар давоми чорабинӣ бо иштироки Ашӯралӣ Ҷалилзода ва масуълони соҳа мусобиқаи волейбол ба хотири гиромидошти Рустамҷон Ҳасанов таҳти шиори «Ҷавонон - созандагони фардои Ватан!» оғоз шуд.
Дар маҳфили тантанавӣ ёру бародарон ва маорифчиёни кишвар, аз ҷумла корманди раёсати маорифи вилояти Суғд Аҳмадҷон Солиев, мухбири махсуси рӯзномаи «Ҷумҳурият» дар вилояти Суғд Ҷовиди Аштӣ, Аълочии маориф ва илми Тоҷикистон Муртазоқул Сафаров, муҳаррири нашрияҳои «Сухани халқ» ва «Маорифи Суғд» Абдусабур Ваҳҳобов, корманди «Ҳақиқати Суғд» Нодир Турсунзода ширкат варзида, дар бораи хизматҳои шоистаи шодравон андешаҳои худро иброз доштанд.
Ҷовиди Аштӣ дар баробари супурдани туҳфаҳои хотиравии ҳайати эҷодии рӯзномаи «Ҷумҳурият» ба фарзанди шодравон Зафарҷон Ҳасанов, сардори раёсати молия ва хоҷагии идораи рӯзнома, ҳамзамон ёд кард, ки сармуҳаррири ин нашрияи бонуфуз Қурбоналӣ Раҳмонзода бо Рустамҷон Ҳасанов ошноӣ доштанд ва барои арҷгузории хизматҳои мондагори ин омӯзгори дилсӯз дар мураттаб ва нашри китоби «Машъалафрӯзи маърифат» (Гулчин аз рӯзгори Рустамҷон Ҳасанов) саҳм гузоштанд.
Чорабинӣ бо супурдани туҳфаҳо аз номи Пешвои миллат муҳтарам Эмомалӣ Раҳмон ба 20 кӯдаки камбизоат ва 30 собиқадори меҳнату маориф ҷамъбаст гардид.

«МАШЪАЛАФРӮЗИ МАЪРИФАТ» рӯнамоӣ шуд
Ба хотири гиромидошти Аълочии маориф ва илми Ҷумҳурии Тоҷикистон, дорандаи Ифтихорномаи Ҳукумати Ҷумҳурии Тоҷикистон Рустамҷон Ҳасанов китоби «Машъалафрӯзи маърифат» (Гулчин аз рӯзгори Рустамҷон Ҳасанов) интишор ёфт. Муҳаррир ва мушовири китоб сармуҳаррири рӯзномаи “Ҷумҳурият” Қурбоналӣ Раҳмонзода буда, он дар чопхонаи “Эр - граф” бо теъдоди 500 нусха нашр шуд.
Қисмати аввали ин маҷмӯа аз мақолаву хотираҳои дӯстону ҳампешагон иборат аст. Қисмати дувумро мақолаҳои таҳлиливу соҳавии Рустамҷон Ҳасанов оро додаанд. Дар бахши охир шеърҳои аҳли қалам васфи муаллим ва зодгоҳи ӯ рустои зебоманзари Басманда мекунанд.
Дар китоб зикр мешавад, ки арҷгузорӣ ба хизмату ранҷҳои гузаштагон ва равшан нигаҳ доштани чароғи ёду ёдгори онҳо аз суннатҳои деринаи мардуми мо будааст. Ин оини нек дар замони соҳибистиқлолӣ эҳёи бештар ёфта, номгузории ноҳияву шаҳрак, кӯчаву хиёбон ва донишгоҳу муассисаҳои таълимии ҳамагонӣ ба номи шахсиятҳои бузургу таъсиргузор ва фарҳангиву илмӣ намунаи олии ин гуфтаҳост.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ин замина корҳои шоистаеро ба сомон расондаанд.
Дар сармақолаи Қурбоналӣ Раҳмонзода – “Шамъи маҳфилу машъалафрӯзи маърифат” омадааст: “Рустамҷон Ҳасанов ҳамчун инсон ончунон хоксору фурӯтан буд, ки бо вуҷуди суҳбатҳои зиёди якҷоя, боре ҳам дар бораи худаш на танҳо ҳамчун шахсият, балки ба ҳайси як омӯзгори қаторӣ ҳам чизе нагуфтааст. Ҳар чи дар бораи устоди ҳампешаам медонам, аз дигарон шунидаам. Шунидаам, ки солҳои аввали соҳибистиқлолӣ, ки, ҳамзамон, вазнинтарин давраи баъдиҷангии Тоҷикистони азиз маҳсуб меёфтанд, роҳбар буд. Роҳбари яке аз калонтарин мактабҳои миёнаи ноҳияи собиқи Ғончӣ (ҳоло Деваштич), роҳбари насли наву ояндасози Ватан. Шунидаам, ки то имрӯз дар замири мардуми тамоми ҷамоат ҳамчун роҳбари ободкор маъво гирифтааст. Роҳбаре, ки корашро аз таъмири боми бинои мактаб оғоз намудаву то ба фаршаш анҷомидааст. Роҳбаре, ки бевосита дасти даҳҳо наврасону ҷавонони деҳаро гирифта, то ба озмунҳои фаннии сатҳи ноҳияву вилоят бурдаву бо ин роҳ мактаб, балки мардуми деҳаро нуфузу обрӯ бахшидааст”.
Рӯнамоии китоби мазкур дар МТМУ № 7 ноҳияи Деваштич, ки бо қарори маҷлиси вакилони халқи вилояти Суғд аз 21 октябри соли 2020, таҳти № 85, ба номи Рустамҷон Ҳасанов гузошта шуд, баргузор гардид.

 

Бузургмеҳри БАҲОДУР,
“Ҷумҳурият”