ИФРОТГАРОӢ

Боз як гумроҳ паси панҷара рафт

 

Суди вилояти Хатлон шаҳрванд Мазҳариддин Гадоевро дар барангехтани кинаю адовати миллӣ, нажодӣ, маҳалгароӣ ва ё динӣ (бо моддаи 189 Кодекси ҷиноятӣ) гунаҳгор дониста, ӯро ба муҳлати 3 сол аз озодӣ маҳрум кард. 

Тибқи иттилои маркази матбуоти Прокуратураи генералӣ, номбурда дар шаҳри Қуми Ҷумҳурии Исломии Эрон таълимоти ғайрирасмии динӣ гирифта, пас аз баргаштан ба Тоҷикистон дар масҷиди деҳаи Гулистони ноҳияи Қубодиён миёни намозгузорон кинаю адовати мазҳабӣ барангехтааст. М. Гадоев борҳо бо имом – хатиби масҷиди деҳа М. Кулолов баҳс карда, даст ба ифрот ва тарғиби ақидаҳои бегона задааст. Манбаъ зикр мекунад, ки маҳкумшуда боре ҳангоми набудани имом – хатиб намози аҳли ҷамоаро бо шеваи дигар имоматӣ кардааст, ки боиси низоъ дар байни намозгузорон шудааст.

 

 

НАФС

18000 сомонӣ номи Искандарро доғдор кард

 

Искандар Асоев, нозири гурӯҳи назорати давлатии зидди сӯхтори қисми мустақили 17-и ҳарбикунонидашудаи Хадамоти давлатии оташнишонии ВКД Ҷумҳурии Тоҷикистон оид ба муҳофизати шаҳри Ҳисор, ба содир намудани ҷинояти қаллобӣ айбдор мешавад.

Дафтари матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки номбурда бо истифодаи мақоми хизматӣ барои ба Донишкадаи ҳарбии Вазорати мудофиаи Ҷумҳурии Тоҷикистон дохил намудан аз шаҳрванд «А» 18000 сомонӣ талаб карда, 22 июли соли 2020 ҳангоми гирифтани маблағ дастгир шуд.

Ҳоло тафтиши пешакии парвандаи ҷиноятӣ нисбат ба И. Асоев бо моддаи 247 қисми 2 бандҳои «в,г» Кодекси ҷиноятӣ (қаллобӣ бо расондани зарари ҷиддӣ ба шаҳрванд ва истифода аз мақоми хизматӣ) анҷом ёфта, барои моҳиятан баррасӣ намудан ба суд ирсол гардидааст.

 

 

ДАР ОРЗУИ ПУЛИ МУФТ

Ошкор гардидани қиморхонаи ғайриқонунӣ дар Қубодиён

 

Кормандони мақомоти корҳои дохилӣ дар ноҳияи Қубодиён қиморхонаеро ошкор намуданд, ки хилофи қонун аст.  

Дар ин бора сомонаи Вазорати корҳои дохилӣ хабар дод. Тибқи иттилои манбаъ, маъмурони милитсия муайян карданд, ки марди 43-солаи сокини Ҷамоати деҳоти 20-солагии Истиқлоли ноҳия дар манзили истиқоматиаш бидуни иҷозатномаи мақомоти дахлдор қиморхона ташкил намуда, бо ҷалби сокинони ҷамоат бо қиморбозӣ маблағи пулӣ ба даст овардааст. 

 

Шуъбаи ҳуқуқи рӯзномаи «Ҷумҳурият»