Дар оғози Паём Пешвои миллат аз таъсири ногувори бемории сироятии коронавирус ба рушди босуботи кишварҳои сайёра ва, аз ҷумла Тоҷикистон, ишора намуданд. Дарвоқеъ, бемории мазкур ба раванди босуръат паст рафтани фаъолнокии иқтисодӣ ва афзоиши бесобиқаи бекорӣ оварда расонд. Хушбахтона, бо ҳидоятҳои Сарвари давлат ва амалӣ гардидани сиёсати оқилонаву бобарор дар кишвари азизамон сарфи назар аз таъсири ногувори пандемияи коронавирус ба татбиқи ҳадафҳои стратегии мамлакат заминаи мусоид гузошта шуда, баҳри расидан ба нишондиҳандаҳои назарраси меҳнатӣ дар ҳама ҷабҳаҳо кӯшишҳои судманд равона шуданд. Аз ҷумла, ҷудо намудани маблағҳои иловагӣ ба соҳаи тандурустии мамлакат барои хариди доруворӣ ва таҷҳизоти тиббӣ, бунёди беморхонаҳои муваққатӣ ва дастгирии кормандони тиб ба маблағи 1 миллиарду 600 миллион сомонӣ, ба шаҳру навоҳии кишвар равона намудани кумакҳо ва мулоқоту суҳбатҳои ҳикматбору боздиду сафарҳои кории бевоситаашон ба сокинони кишвар неруву тавони тоза бахшида, рӯҳияи мардумро болида гардонданд. Ҳамаи ин тадбирҳои хирадмандонаву оқилона дар маҷмӯъ, садди роҳи ҳамагуна нобовариву ҳаросҳои равониву маънавии мардумро дар мубориза бо ин бемории аср гирифт. 

Сарфи назар аз мушкилоти ҷойдошта бо азму иродаи устувору матонати ватандӯстона ва бо ҳузури мубораки Пешвои миллат муҳтарам Эмомалӣ Раҳмон дар сатҳи баланди маънавию фарҳангӣ ва бо шукӯҳи ҷаҳонӣ дар асоси қарори Созмони бонуфузи байналмилалии ЮНЕСКО баргузор гардидани ҷашнҳои 5500 - солагии Саразми бостонӣ ва 700 - солагии Камоли Хуҷандӣ ҳамчун рӯйдодҳои хубу хотирмони соли 2020 маҳсуб ёфт. Ин тадбирҳои шоиста дар замони ниҳоят печидаи авзои ҷаҳонӣ аз соҳибтамаддуниву соҳибфарҳангӣ ва арҷгузориву эҳтироми мардуми шарифи тоҷик ба таъриху гузаштаи пурифтихори худ шаҳодат дод.

Бо   иштироки  васеи  аҳолӣ  ва  сарҷамъонаву  бо   ҳамдилии саросарӣ баргузор гардидани маъракаҳои муҳими сиёсӣ - интихоботи вакилони Маҷлиси намояндагон, маҷлисҳои маҳаллии вакилони халқ ва интихоботи Президенти Ҷумҳурии Тоҷикистон аз ҷонибдориву ҳамовозии сокинони ватандӯсту хештаншиноси кишвар аз сиёсати пешгирифтаи давлату Ҳукумати мамлакат шаҳодат дод. Бо раъйи якдилонаи кулли мардуми шарифи Тоҷикистон ба ҳайси Президенти Ҷумҳурии Тоҷикистон интихоб гардидани Пешвои миллат бори дигар собит намуд, ки сиёсати оқилонаву дурнигарона аз ҷониби мардуми шарифи Тоҷикистон ҳамаҷониба пуштибониву дастгирӣ гардида, халқи саодатманди тоҷик бо роҳнамоиву раҳбарии хирадмандонаи Пешвои маҳбуби худ ба сӯи ояндаи ободу дурахшон қадамҳои устувору баҳодурона гузошта истодаем.

Дар замоне, ки тамоми кишварҳо ба мушкилоти молиявию иқтисодӣ мувоҷеҳ гардиданд, маҳз амалӣ шудани нақшаву ниятҳои созанда ва ҷаҳду талоши халқи хештаншиноси тоҷик буд, ки соли сипаришуда иқтисодиёти кишвар 4,5, истеҳсоли маҳсулоти саноатӣ 9,7 ва кишоварзӣ 8,8 дарсад афзоиш ёфт. 

Бо мақсади расидан ба татбиқи бонизоми ҳадафи чоруми стратегӣ - саноатикунонии босуръати мамлакат 300 корхонаву коргоҳи нави саноатӣ бо беш аз 6500 ҷойи корӣ дар саросари кишвар бунёд ва мавриди истифода қарор гирифтанд. Ҳамзамон, 18300 иншооти истеҳсолӣ, иҷтимоӣ ва фарҳангии ба истиқболи Ҷашни 30 - солагии Истиқлолияти давлатӣ бунёд ва ба истифода дода шуданд.

Албатта, сокинони шарафманди шаҳри Бӯстон низ бо илҳом аз сиёсати бунёдкоронаву дурнигаронаи роҳбарияти олии давлату Ҳукумат баҳри расидан ба татбиқи бонизоми ҳадафи олии кишвар, яъне таъмини зиндагии шоиста ба ҳар фарди мамлакат ҷаҳду талош намуда, барои истиқболи ҷашни фархундаву хуҷастаи умумимиллиамон саҳмгузорӣ намуда истодаанд. 

Соли сипаришуда бо иштироки Сарвари давлат мавриди истифода қарор гирифтани корхонаи истеҳсоли шифер ва қубурҳои асбестии ҶДММ «Восидзода», корхонаи хусусӣ оид ба истеҳсоли қубурҳои пластикии «Сифат пласт» ва бинои маъмурии Кумитаи иҷроияи Ҳизби Халқии Демократии Тоҷикистон дар шаҳр аз рӯйдодҳои хотирмони сокинон гардида, рӯҳияи моро барои вусъати тадбирҳои ободонӣ дучанд гардонд.

Дар ин сол бо назардошти тағйиротҳо иҷрои буҷети шаҳр ба андозаи 106,6 дарсад ва нақшаи қисми даромади буҷети маҳаллӣ ба андозаи 106,7 дарсад таъмин гардид. 

Айни замон дар шаҳр 33 корхонаи саноатӣ фаъолият дошта, соли сипаришуда ҳаҷми истеҳсоли маҳсулоти саноатӣ бо назардошти ҳамаи хизматрасониҳо ва бахши хусусӣ ба маблағи 516,8 миллион сомонӣ расид, ки нисбат ба ҳамин давраи соли гузашта 111 миллион сомонӣ зиёд аст. Корхонаҳои саноатӣ ба маблағи 444,7 миллион сомонӣ маҳсулот истеҳсол карданд, ки нисбат ба соли қаблӣ 106,3 миллион сомонӣ зиёд аст. Соҳибкорону истеҳсолкунандагони шаҳр баҳри саҳмгузорӣ ба таъмини амнияти озуқаворӣ дар давраи пандемияи коронавирус 76,9 ҳазор тонна орд, 284 тонна равғани рустанӣ, 142 тонна маҳсулоти қаннодӣ истеҳсол карданд. 

Бо шукргузорӣ аз сиёсати бобарору умедбахш ва нақшаву барномаҳои мукаммалу мушаххас, ки мардумро ба сӯи музаффарияту фардои ободи Ватан раҳнамоӣ менамоянд, мо - сокинони шаҳри Бӯстон дар атрофи сиёсати оқилонаи Пешвои миллат муҳтарам Эмомалӣ Раҳмон муттаҳидтар гардида, тамоми донишу малака ва таҷрибаи хешро баҳри шукуфоии кишвари биҳиштосоямон равона хоҳем кард.

 

Раъно ҲОШИМЗОДА,

раиси шаҳри Бӯстон