Аз оғози солҳои соҳибистиқлолӣ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба баланд бардоштани мавқеи занон дар ҷомеа таваҷҷуҳи пайваста зоҳир мекунанд.

Дар Паёми навбатии худ ба Маҷлиси Олӣ Сарвари давлат таъкид карданд: «Ҳукумати мамлакат ташаббусҳои занону бонувони кишварро минбаъд низ дастгирӣ карда, ба хотири ҷалби бештари онҳо ба вазифаҳои роҳбарикунанда тадбирҳои иловагиро амалӣ мегардонад».

Аз таҳлилу баррасии муфассали Пешвои миллат бармеояд, ки дар интихоботи соли 2020 ба Маҷлиси миллии Маҷлиси Олӣ 8 бону ё 25,8 дарсад ва Маҷлиси намояндагон 15 нафар ё 23,8 дарсад интихоб шуданд, ки нисбат ба интихоботи гузашта қариб чор дарсад зиёд мебошад.

Ҷудо намудани гранти президентӣ ба занони соҳибкор низ яке аз иқдомҳои судманди Ҳукумати мамлакат ва Президенти кишвар муҳтарам Эмомалӣ Раҳмон мебошад, ки фаъолияти соҳибкории занонро боз ҳам беҳтару хубтар гардондааст. Ин аст, ки тайи чанд соли охир шумораи зиёди занону духтарон, хусусан занони хонашин, соҳиби касб ва ҷойи кор шуданд.

Президенти мамлакат ба ин самти пурсамари кор таваҷҷуҳ карда, гуфтанд: «Ҷудо намудани қарз яке аз василаҳои беҳтар намудани шароити иқтисодии занон ва оилаҳо мебошад. Соли 2020 ба занону бонувони соҳибкор ба маблағи 2 миллиарду 100 миллион сомонӣ қарз дода шуд.

Бо ин мақсад, ба Кумитаи кор бо занон ва оила супориш шуд, ки лоиҳаи қарори Ҳукумати мамлакатро дар бораи Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021 – 2030 ва нақшаи амалисозии онро барои солҳои 2021 – 2025 таҳия ва пешниҳод намояд».

Аз ин пешниҳоди дурандешона бонувони мо бояд самаранок истифода баранд. Қарзҳои имтиёзнокро барои пешрафти рӯзгори худ, таъмини маишати аҳли хонавода ва, дар маҷмӯъ, барои рушди ҷомеа истифода намоянд.

Фаъолияти бонувон дар соҳаи кишоварзӣ ва рушди иқтисодиёти кишвар низ назаррас буда, ҳоло шумораи роҳбарони хоҷагиҳои деҳқонӣ аз ҳисоби занон 35600 нафар ва занони соҳибкор 77400 нафарро ташкил медиҳад.

Пешвои миллат масъалаи бо кор ва таҳсил фаро гирифтани занонро ҳамеша таъкид намуда, дар Паёми навбатиашон низ ба хизмати давлатӣ ва идоракунии давлат торафт бештар ҷалб гардидани онҳоро падидаи фараҳбахшу хушоянд арзёбӣ намуданд.

Дар ҳақиқат, зан нигаҳдори хонавода, расму оин, касбу ҳунарҳои қадима ва забони ноби тоҷикист. Дилсӯзиву ғамхориҳои пайвастаи Сарвари давлат аз ҳамин назар сарчашма мегиранд ва моро ба ояндаи нек дилгарм мекунанд.

 

Дилрабо ФАЙЗУЛЛОЕВА, 

мудири бахши табъу нашри коллеҷи информатика ва техникаи компютерии шаҳри Душанбе