Ба иттилои Кишвар Нидозода, мудири филиали № 20 Бонки давлатии амонатгузории Ҷумҳурии Тоҷикистон «Амонатбонк» дар ноҳияи Тоҷикобод, саҳми бонки мазкур дар хизматрасонӣ ба аҳолӣ, пардохтҳои коммуналӣ, андоз, барқ, музди меҳнат, нафақа, кумакпулиҳо ва ғайра, инчунин,  интиқоли маблағ аз дохилу хориҷи кишвар  торафт назаррас мегардад. 

 

Дар  Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон зикр гардид: “Ҳарчанд дар ҷумҳурӣ ба соҳаҳои гуногуни иқтисоди кишвар қариб 10 миллиард сомонӣ қарз дода шуд, ки ин нисбат ба соли пешин 4,6 фоиз зиёд мебошад, вале ин нишондиҳанда барои расидан ба ҳадафҳои рушди кишвар қонеъкунанда нест. Бояд якҷо бо ташкилотҳои қарзӣ оид ба беҳтар намудани сифати дороиҳои низоми бонкӣ, афзоиш додани пешниҳоди қарзҳои дарозмуддат ба соҳибкорони истеҳсолӣ ва фаъол низоми рейтинги миллӣ барои ташкилотҳои қарзӣ тадбирҳои зарурӣ андешида шаванд”.

Баҳри татбиқи ин дастурҳои Пешвои муаззами миллат аз тарафи роҳбарияти филиали Бонки давлатии амонатгузории Ҷумҳурии Тоҷикистон “Амонатбонк”  дар ноҳияи Тоҷикобод барои дар сатҳи зарурӣ ба роҳ мондани хизматрасонии бонкӣ  чораҳои зарурӣ андешида мешаванд. Имрӯзҳо кишоварзону соҳибкорон барои гирифтани маблағҳои қарзӣ ба филиали бонки мазкур муроҷиат менамоянд, ки талаботи онҳо дар сатҳи зарурӣ қонеъ гардонда мешаванд. Дар Тоҷикобод картошкапарварӣ  самти афзалиятнок буда, дастгирии кишоварзон боиси рушди ноҳия мегардад. Зимни сафари кориашон Пешвои миллат муҳтарам Эмомалӣ Раҳмон ба роҳбарияти  “Амонатбонк” супориш доданд, ки бо мақсади рушди соҳаи кишоварзӣ барои деҳқонони минтақаи Рашт қарзҳои кӯтоҳмуддат ҷудо карда шаванд. Дар ин муддат ба кишоварзон қарзҳои кӯтоҳмуддат пешниҳод гардид, ки онро, асосан деҳқонон, барои хариди тухмӣ, доруҳои минералӣ, заҳрхимикатҳо ва хизматрасонии техникаҳои хоҷагии қишлоқ истифода намуданд. 

Дар маҷмӯъ, дар соли 2020 ба 285 мизоҷ ба андозаи  2 миллиону 265 ҳазор  сомонӣ қарз дода шуд. Лозим ба ёдоварист, ки дар  соли 2020 қарзҳо аз 2,5 ба 1, 8 фоиз кам гардид.  Дар соли 2021  ба мизоҷон қарзҳои 1,5 фоиза пешниҳод гаштанд, ки ин  барои афзун намудани маҳсулоти соҳаи кишоварзӣ мусоидат менамояд. Қарзҳои мазкур аз 1 феврали соли равон барои соҳаи кишоварзӣ, аз ҷумла картошкапарварӣ, боғдорӣ, занбӯриасалпарварӣ ва дигар соҳаҳо, пешниҳод шудаанд.  Дар соли сипаришуда барои соҳибкорӣ ба шаҳрвандон дар ҳаҷми 1,8 ва 2,4 фоиз ба маблағи 1 миллиону 20 ҳазор сомонӣ қарзҳои кӯтоҳмуддат, барои дастгирии муаллимони ҷавон дар ҳаҷми 66 ҳазор сомонӣ қарзҳои бефоиз пешниҳод гаштанд.

Бори хизматрасонии гуногуни идораю корхонаҳо ва аҳолӣ, асосан ба зиммаи филиали № 20-и БДА ҶТ «Амонатбонк» дар ноҳия, филиалҳои «Ориёнбонк», «Аввалин бонки молиявии хурд» ва ”Коммерсбонк” вогузор гардидааст. Мушоҳидаҳо ба хулосае меоранд, ки бо вуҷуди нисбатан фаъол будани нуқтаҳои бонкҳои номбурда онҳо қудрати пурра бароварда сохтани ниёзи мардумро надоштанд. Бахусус дар ҳисоби маблағи аз муҳоҷирони меҳнатӣ воридгардида соли гузашта  мушкилот пеш омада буд. Шумораи зиёди одамон соатҳои дароз ва ҳатто чанд рӯз навбат мепоиданд. 

Аз суҳбат бо мутасаддиёни филиал ва мизоҷони нуқтаҳои «Амонатбонк» маълум гашт, ки мушкилоти ҷойдошта дар ҳама бонкҳо қариб як хел аст. Яъне, зиёд шудани талабот ва кам гардидани нуқтаҳои хизматрасонии бонкӣ гардиши сусти пули нақд интиқоли пул аз ноҳия ба дигар шаҳру навоҳӣ, мавҷуд набудани корхонаҳои истеҳсолӣ ва фаъолияти чашмраси соҳибкорӣ, сифати пасти хизматрасонии интернетӣ, омилҳое будаанд, ки сабабгори сари вақт қонеъ нагардондани мизоҷон мешаванд.

     

Дилшод АМИРОВ, 

«Ҷумҳурият»